A Xunta proxecta un polígono agroforestal en Bóveda para poñer en valor case 52 hectáreas

• O conselleiro do Medio Rural mantivo un encontro cos veciños implicados no que será o futuro polígono de iniciativa pública do Val de Lemos

A Xunta traballa no desenvolvemento dun polígono agroforestal no concello de Bóveda, que actualmente está en fase de actuacións previas. Unha vez rematado, suporá a mobilización de case 52 hectáreas, dividido en 292 parcelas correspondentes a 200 propietarios. Así o destacou o conselleiro do Medio Rural, José González, acompañado da directora xeral da Axencia Galega de Desenvolvemento Rural, Inés Santé, nun encontro cos veciños implicados no que será o futuro polígono de iniciativa pública de Val de Lemos.
O conselleiro sinalou que este tipo de iniciativas póñense en marcha en aplicación da Lei de recuperación da terra agraria de Galicia, co fin de recuperar grandes espazos produtivos segundo o tipo de cultivo máis acaído ou de maior tradición en cada zona. O obxectivo é dinamizar o territorio e xerar actividade económica. Isto, para facilitar que siga sendo posible vivir no e do rural e para anticiparse aos lumes, evitando que se rexistren ou, en todo caso, para minorar o seus efectos, salientou o conselleiro.
Ademais dos polígonos, a Xunta está a apostar por outras figuras para recuperar e valorizar a terra agraria, entre as que cómpre destacar as aldeas modelo, que pretenden recuperar as contornas de núcleos de poboación, como as xa aprobadas e rematadas aldeas de Parada dos Montes, na Pobra do Brollón (de 15,55 hectáreas) e a de Trascastro, no concello do Inicio (14 ha de superficie). Tamén están aprobadas a de Moreda, en Folgoso do Courel (38,86 hectáreas); Bustelo de Fisteus, no concello de Quiroga (12,68 hectáreas) e Francos de Proendos, no municipio de Sober (12,87 hectáreas).
Por último, José González tamén aludiu á aldea modelo de Vilela, en Navia de Suarna, que se atopa en fase de recollida de sinaturas e conta cunha superficie de 47,83 hectáreas.•