• O Alcalde de Monforte, José Tomé, anunciou que os traballos estarán rematados na súa totalidade, si as circunstancias do tempo o permiten, aproximadamente a finais do mes de outubro.
Logo da alarma causada a finais do pasado mes de xuño, cando se descubriu unha importante deficiencia na ponte da parroquia monfortina de Piñeira, cun dos seus piares desprazados, a ponte quedou pechada ao tráfico e a peóns, e o Concello contratou á empresa Extraco para que avaliase os danos e elaborase unha proposta de solución. Estes traballos xa se completaron, e xa se iniciaron as obras que conducirán á substitución do piar. O Alcalde, José Tomé Roca, acompañado pola Tenente de Alcalde, Gloria Prada, e o Concelleiro de Obras, Medio Rural e Servizos, José Luis Losada, visitou a posta en marcha dos traballos. “Tras seren executados os correspondentes traballos de enxeñería a cargo da empresa Extraco e do director de obra designado polo Concello, traballos necesarios para determinar a situación do piar da ponte e para darlle unha solución á deficiencia detectada, nos próximos 5 días levarase a cabo a colocación de micropilotes nunha profundidade de 9 metros para estabilizar o terreo e proceder á construción do novo pilar”, subliñou o Alcalde.
O rexedor monfortino tamén anunciou que os traballos estarán rematados na súa totalidade, si as circunstancias do tempo o permiten, aproximadamente a finais do mes de outubro.
Dado que as obras son contratadas por emerxencia, o custe das actuacións estímase segundo os técnicos, en 200.000 euros máis ive, o que ascenderá a 242.000 euros aproximadamente.
-”Unha vez estean rematadas as obras de arranxe da ponte de Piñeira”, concluíu o Alcalde, procederemos ó restablecemento do tráfico de vehículos e de persoas, previsiblemente en novembro, unha vez que estea endurecido o novo piar”.
Diagnose
Deste xeito, os traballos de enxeñería mencionados polo Alcalde, comprenderon a inspección da ponte, así como o levantamento topográfico do cauce, a elaboración dun estudo hidrolóxico, a emisión dun informe xeotécnico e o correspondente proxecto técnico da reconstrución do pilar afectado.
En concreto, os informes emitidos indican que se produciu un descalce da cimentación que provocou un asento e un xiro do pilar, que tivo como consecuencia a perda de apoio entre o taboleiro e dito pilar.
Esta perda de apoio “obrigou ó corte da vía, xa que o vano resultante conta co dobre de luz que os vanos iniciais, non tendo a capacidade estrutural necesaria para soportar as cargas do tráfico, nin estando garantida a capacidade estrutural baixo o propio peso”, indica o informe.
Reposición do piar
Unha vez analizada a situación da ponte, os traballos que se están a levar a cabo para a reparación da ponte son os seguintes.
1.- Desvío do cauce a través dos vanos da marxe esquerda do río Cabe.
2.- Formación de plataforma de traballo, con recheo de escollera.
3.- Colocación de cimbra de apeo do taboleiro.
4.- Execución da cimentación profunda mediante micropilotes e encepado, nunha profundidade de 9 metros para estabilizar o terreo, sobre a que se construirá de novo o piar, coa mesma forma dos piares existentes.
5.-Reposición ao estado inicial do cauce do río Cabe.•
Cargando ...
