Feira do Viño de Pantón
A Deputación de Lugo inviste este ano no concello de Pantón máis de 350.000€ a través de diferentes vías de actuación que melloran os servizos e calidade de vida dos veciños e veciñas. Concretamente, a institución provincial destina máis de 160.000€ na mellora de estradas, máis de 111.000€ ao fomento do emprego, 26.000€ para reforzar o Servizo de Axuda no Fogar (SAF), ou 25.000€ para apoiar o turismo a través de diferentes medidas.
9 POSTOS DE TRABALLO
Grazas a 111.000€ da Deputación para o fomento do emprego, este ano creáronse un total de 9 postos de traballo, entre eles de peón para diferentes servizos, un monitor deportivo, un auxiliar administrativo ou un técnico auxiliar de biblioteca.
Grazas á institución provincial, o Concello de Pantón, a través do Plan Único de Cooperación 2022, tamén pode comprar novos equipos informáticos para as oficinas municipais e mellorar a súa administración electrónica. A institución provincial achega para estes conceptos preto de 11.200€.
Outra das actuacións importantes que o Concello de Pantón poderá acometer grazas ás achegas que a Deputación de Lugo fai a través do Plan Único de Cooperación 2022 ten que ver co turismo. Concretamente, a institución provincial destinou 10.000€ para unha nova edición da Feira do Viño. Ademais, a Deputación de Lugo financia con 6.270€ o festival Trece Roeis e achega ao Club de Golf de Augas Santas un total de 10.000€ para o torneo feminino Ribeira Sacra Patrimonio de la Humanidad, unha cita xa consolidada no calendario internacional deste deporte.
Precisamente, no eido deportivo a Deputación destina 5.000€ neste concello do sur da provincia para actividades de zumba, pilates e ximnasia de mantemento.
Máis de 4.600€ das arcas provinciais van destinados a fomentar en Pantón as actividades culturais de carácter itinerante, como son as diferentes animacións, talleres e obradoiros que se realizan ao longo do ano. E no que respecta ao ámbito cultural, a Asociación Cultural Escola de Baile e Gaitas O Castro recibe unha achega de 1.365€ para a realización dunhas xornadas de promoción e difusión da cultura e da música popular galega.
Mediante axudas en réxime de concorrencia competitiva, a ANPA do Colexio Público de Pantón recibe da Deputación 1.120€ para poder desenvolver o programa Da escola á granxa, visitas de escolares de Primaria a gandarías, producións agrícolas e pequenas empresas de transformación de todas as comarcas.
Outros 2.815,65€ da institución provincial van destinados á Comunidade de Augas Potables de Amandi-Pombeiro para a renovación das tubaxes de diferentes mananciais.
No capítulo Servizos Sociais, cos fondos do Plan Único provincial 2022, a Deputación inviste 11.257,75€ para o Servizo de Axuda no Fogar, unha prestación básica moi importante porque axuda a mellorar a calidade de vida das persoas permitíndolles a permanencia no seu entorno de convivencia habitual.
Pantón forma parte tamén da rede de concellos do programa de termalismo da Deputación, Lugo Termal, un programa mediante o que a institución provincial ofrece descontos en tres balnearios da provincia –entre eles o de Augas Santas- para favorecer o benestar da veciñanza e, ao mesmo tempo, impulsar o turismo sostible e de calidade a través do termalismo.
A institución provincial ten en marcha ademais proxectos de calado para este concello, como o Centro de Atención a Maiores, para o que se asinou un convenio de colaboración por importe de 1,7M€. •
A Deputación de Lugo acometeu melloras de camiños e obras importantes en estradas de Pantón
• No que respecta ás infraestruturas, a institución provincial aportou un total de 161.874,27€ a través do Plan Único de Cooperación cos Concellos para a mellora de diferentes camiños e accesos en varias parroquias e núcleos do municipio. O plan inclúe a mellora da pavimentación en Vilamelle por un importe de preto de 66.800€; o acondicionamento de vías municipais en Eire, Ferreira, Espasantes, Mañente e Pantón por case 43.000€; e a mellora dos accesos a Bazal, a Piuca e Cascaxide, así como diferentes camiños de Tribas e Tuiriz por un importe total que supera os 52.000€.
Así mesmo, o pasado ano 2021 a Deputación acometeu obras importantes en estradas de Pantón cun investimento que superou os 205.000€. En concreto rehabilitou o firme da estrada LU-P-4110, que conecta Arribada, na parroquia de San Fiz de Cangas, a Budián, en San Romao de Acebre, nun tramo de algo máis de 5 quilómetros; o da LU-P-4111, que comunica Santiago de Castillón desde Ferreira de Pantón, nun tramo de máis de 9 quilómetros, desde Santa Mariña de Eiré a Marce; e o firme da LU-P-4114, que une Toldaos con Augas Santas, nun treito de preto de 4 quilómetros.•
Cargando ...
