Ana Pontón reclamou en Monforte solucións para o deterioro que vive a sanidade pública no sur de Lugo

• Denuncia que a política de recortes do PP ao longo destes trece anos «están poñendo en risco a saúde dos galegos e das galegas»

A portavoz nacional do BNG, Ana Pontón, está a acrecentar a súa presenza no sur de Lugo, nos últimos tempos, para coñecer de primeira man os problemas da comarca, e facer valer os postulados do seu partido e ademais organizar e presentar as candidaturas nacionalistas nos diversos concellos da comarca de cara ás eleccións mucipais do próximo ano.
A pasada semana visitou o Hospital de Monforte, para manter unha reunión cos representantes da xunta de persoal, que lle trasladaron persoalmente as deficiencias e problemática que están a vivir. Ana Pontón denunciou o que considera un claro deterioro da sanidade pública na comarca do sur de Lugo que tamén afecta ao seu Hospital Comarcal, pola “falta de recursos e profesionais en todas as categorías” dun centro hospitalario no que, según os datos recibidos da xunta de persoal, as listas de espera subiron dende a pandemia un 35% para as e os pacientes que agardan por unha operación e un 50% para as persoas que esperan cita co seu especialista.
A líder nacionalista avanzou que o BNG vai seguir denunciando os recortes do Goberno do PP e reclamando “solucións para que se cubran todas as prazas vacantes en toda a área sanitaria e todos os especialistas neste hospital” que, segundo advertiu, xa non pode prestar moitos dos seus servizos e vese na obriga de derivar pacientes a Lugo ou proximamente ao Barco de Valdeorras.
“Todo isto provoca que en vez de contar cunha atención sanitaria máis próxima, o que fai o PP é alonxar máis á cidadanía da atención sanitaria”, afirmou logo de participar na concentración simbólica en defensa dos servizos da sanidade pública na comarca, á que tamén asistiron o portavoz municipal, Emilio J. Sánchez, o alcalde da Pobra do Brollón, Xosé Luís Maceda, a deputada Carme Aira e outros responsables locais e comarcais.
Pontón denunciou que os recortes do Goberno do PP nos últimos 13 anos “están poñendo en risco a saúde dos galegos e das galegas” ao situar en situación de colapso o sistema sanitario galego “con decisións que claramente están debilitando a sanidade pública para beneficiar á privada”.
“Nos últimos 13 anos a Atención Primaria viu como se lle quitaban 2.000 millóns de euros, que non se investiron nela, como se recortaba en persoal, con taxas de reposición que claramente debilitaron o noso sistema público, e como se precarizaban tamén as condicións laborais das e dos profesionais”, incidiu para explicar as listas de espera para acudir ao médico ou médica de cabeceira, o recorte de pediatras ou o déficit de persoal no hospital comarcal de Monforte. A portavoz do BNG fixo un chamamento ao PP para que, no marco do próximo debate orzamentario, “se descabalgue da soberbia e teña disposición para negociar máis recursos para a sanidade pública”. Neste sentido, recordou as alternativas que o Bloque pon enriba da mesa e entre as que citou un plan de 200 millóns de euros para reforzar a Atención Primaria e outro de 50 millóns para crear novas especialidades, por exemplo, en saúde mental, ámbito que concentra o 30% das consultas na Primaria.
Ao seu xuízo, son dúas medidas “que se poden levar adiante se hai vontade política, pero o problema que temos é que o PP está convertido nun partido que quere demoler a sanidade pública deste País”, polo que recalcou en que o Bloque vai seguir “defendendo con unllas e dentes” a sanidade pública e reclamando solucións “porque é evidente que temos un problema grave que non pode repercutir na saúde da xente”, concluíu.•