4 foron os proxectos que se presentaron ao Concurso de Proxectos Empresariais Ribeira Sacra que este ano alcanzaba a VIII edición. Deles novo foron os finalistas que se presentaban ao acto organizado pola Asociación Semente no Parador de Monforte para presentar as súas propostas. Finalmente a gañadora foi a denominada Lácteos Ribeira Sacra, un proxecto para transformar o leite que produce Paluán SC, unha gandería monfortina, socios da Cooperativa Lemos. O proxecto en cuestión propón a elaboración dun queixo con viño da Ribeira Sacra, e foi defendido por Lucía López, nova estudante de veterinaria, filla dos promotores de Paluán SC. Recibiu un premio de 10.000 €. O segundo premio, dotado con 5.000€ levouno o proxecto A Maruxiña, que presentou unha idea para unha granxa ecolóxica de galiñas. E o terceiro foi para Beniu Soluciones, que se levou 3.000 €.
FRANCISCO CONDE, VICEPRESIDENTE DA XUNTA
O acto contou coa presenza do vicepresidente primeiro e conselleiro de Economía, Industria e Innovación, Francisco Conde, quen destacou na rolda de prensa da oitava edición dos premios Semente Ribeira Sacra a contribución desta iniciativa ao desenvolvemento económico e social de Monforte de Lemos e de toda a contorna. Así, Conde agradeceu o traballo da asociación Semente Monforte, e subliñou que apoiar o emprendemento é tamén investir en benestar, contribuíndo á creación de emprego de calidade e á fixación de poboación no rural.
Neste eido, o vicepresidente económico, que participou na entrega de premios, sinalou que os emprendedores galegos contan con diferentes apoios no eido do financiamento e do asesoramento e lembrou iniciativas como o coworking da Ribeira Sacra. Este ten permitido nas súas seis primeiras edicións apoiar máis de 100 proxectos, contribuíndo á creación de preto de 40 empresas e de máis de 70 postos de traballo.
Sinalour ademais que para reforzar un ecosistema que conxugue iniciativa empresarial e innovación configurándose, así, como un motor de reforzo da modernización e diversificación da economía de Galicia, a Xunta de Galicia ten en marcha a nova Axenda Startups. Con esta folla de ruta, á que se destinan 15 millóns de euros, búscase contribuír á creación de 100 novas empresas e a acelerar 200 nos próximos dous anos, prevéndose a xeración de 600 postos de traballo vencellados ás novas compañías. •
EspertaMonforte critica a non participación do Concello de Monforte nos Premios Semente Ribeira Sacra
O concelleiro Jaime Germán Vázquez, voceiro do grupo municipal de EspertaMonforte, logo de asistir á entrega dos premios Semente Ribeira Sacra, manifestou a súa intención de levar ao próximo pleno do concello que terá lugar o vindeiro luns día 28 un rogo, amosando a súa incomprensión pola postura do equipo de goberno da non participación do Concello de Monforte nos mesmos, e califican de inadmibie dita ausencia entre os concellos colaboradores. O voceiro de EspertaMonforte, critica, por contra, a colaboración económica do concello de Monforte en programas como «EL CAMINO CREATIVO», promovido pola asociación España Creativa, ironizando coas escasas raices e froitos que reporta a Monforte de Lemos. •
