Julio Álvarez, unha das figuras históricas máis destacadas da política local no sur de Lugo, decidiu dar un paso atrás, e non presentarse como candidato do PP ás próximas eleccións municipais. E faio logo de estar á fronte da alcaldía de Quiroga durante 36 anos consecutivos, conseguindo 9 maiorías absolutas con porcentaxes entre o 70 e o 82% dos votos. Motivos persoais (a súa xubilación laboral) e unha actividade no mundo empresarial axudaron a tomar esta decisión na que pesou sobre todo a idea de que tras moitos anos “é o momento de dar un paso ao lado para deixar que xente nova e con ideas frescas asuma o temón da vida municipal de Quiroga”.
Julio Álvarez, que é alcalde de municipios de menos de 3.000 habitantes de toda España que máis anos se mantivo no seu cargo, é tamén o presidente do Partido Popular a nivel local, actualmente forma parte da executiva do Partido Popular de Galicia e da executiva provincial. Forma parte tamén da directiva da FEGAMP e representa aos municipios con menos de 5.000 habitantes na Comisión Galega de Seguridade, na Comisión de Urbanismo de Galicia, no Consello Escolar Galego e na Comisión de Turismo de Galicia. Pero ademais da súa incombustible presenza na política local de Quiroga, Julio Álvarez tivo tamén tamén unha presenza destacada a nivel provincial e galego, foi Vicepresidente da Deputación Provincial de Lugo durante 8 anos (baixo o mandato de Francisco Cacharro), Deputado durante 16 anos, Secretario de Política Municipal de Galicia, portavoz e vicepresidente de Desarrollo Local na FEMP durante 11 anos e presidente fundador da actual FEGAMP. Pero sin dúbida, foi a vila de Quiroga a que centrou a súa atención e dedicación, coa idea de convertila nunha “pequena cidade”, e dotala de todos os servizos que esta ofrece aos seus veciños, sen esquecer os 121 núcleos de poboación cos que conta o municipio. Moitas foron as intervencións que se fixeron na vila de Quiroga durante o seu mandato: construíronse catro parques infantís, un novo cuartel da Garda Civil, máis de 40 vivendas de protección oficial, o Centro Social da Terceira Idade e o Centro Social da Ribeira, a Casa da Cultura, o Auditorio Municipal, o Museo Xeolóxico, o Museo Etnográfico e o pavillón polideportivo; e rehabilitouse a antiga Escola Fogar para convertela nun albergue con 115 camas. Remodelouse e ampliouse a Casa Consistorial, o Campo de Fútbol, púxose en funcionamento o Centro de Saúde e xestionouse a posta en marcha do PAC para atender as urxencias de toda a comarca. Dotouse ao municipio dunha Radio e Televisión propia (o único concello de Galicia), dunha Residencia da Terceira Idade, dun Centro de Día e púxose en marcha un centro de Atención Temperá e Post- Temperá. Construíuse a praza de España con aparcamentos subterráneos, tres céntricas rúas, aparcamentos ao aire libre (incluíndo un para autocaravanas) e remodeláronse dúas veces as piscinas municipais. Rehabilitouse a praza Maior, o casco antigo da vila e a antiga cárcere comarcal. Construíuse o complexo turístico de Augas Mestas e o matadoiro comarcal e púxose en marcha o Polígono Industrial. Impulsouse a Feira do Viño dándolle un perfil máis actual converténdose nun evento dos máis importantes de Galicia. Púxose en valor o aceite, recuperándose o seu cultivo e a súa tradición, e conseguiuse que a Mostra do Aceite sexa recoñecida como Festa de Interese Turístico de Galicia.
Julio Alvarez declarou que aínda que non se presente ás próximas eleccións “seguirei asumindo as miñas responsabilidades políticas e administrativas ata que haxa un novo equipo de goberno”. Para rematar “agradecendo profundamente a todos os veciños de Quiroga e ás distintas directivas do Partido Popular Provincial e de Galicia, a confianza que depositaron en min durante estes 36 anos”.•
