Xornada de portas abertas na residencia de Ribas de Sil para tomar contacto coas instalacións e co persoal do centro

• O Centro de Atención a Maiores de Ribas de Sil, o noveno da rede provincial da Deputación, ofrece 29 prazas asistenciais e crea 25 postos de traballo directos

José Tomé Roca durante a xornada de portas abertas da nova residencia de Ribas de Sil. Foto GPDL.

O Presidente da Deputación de Lugo, José Tomé Roca, visitou o Centro de Atención a Maiores (CAM) de Ribas de Sil no marco dunha xornada de portas abertas organizada pola institución en colaboración co Concello durante a que as persoas que solicitaron praza e outras interesadas tomaron contacto coas instalacións e co persoal do centro.
“Cumprimos co compromiso que tiñamos adquirido co Alcalde, co Concello e cos veciños e veciñas de Ribas de Sil de ter a punto esta residencia antes de acabar este ano 2022 para que poidan entrar a vivir nas vindeiras semanas os primeiros usuarios e usuarias”, subliñou o mandatario provincial, quen lamentou que o rexedor, Miguel Ángel Sotuela Vega, non puidera acudir por motivos de saúde. José Tomé asegurou en todo caso “que todo vai ben”, desexoulle unha pronta recuperación e avanzou que “volveremos nuns meses para que el poida participar na inauguración da residencia, pola que traballou e loitou tanto”. Na visita, na que participaron numerosos veciños, o Presidente estivo acompañado polos deputados de Promoción Económica e Social, Pablo Rivera Capón, de Participación Cidadá, Roberto García Pernas, e de Medio Ambiente, José Luis Raposo, así como do primeiro tenente de Alcalde de Ribas de Sil, Roberto Castro, e de concelleiros e concelleiras da Corporación municipal e alcaldes da zona. O Presidente deu as gracias ó Alcalde de Ribas de Sil e a todo o seu equipo polo seu traballo, e recoñeceu o labor dos seus predecesores no cargo, e dos traballadores e traballadoras do Concello e da Deputación implicados na posta en marcha da residencia.
Co CAM de Ribas de Sil, o noveno da rede provincial, a Deputación ofrece 29 prazas asistenciais e crea 25 postos de traballo directos, ademais dun retorno en termos económicos e de emprego para o municipio e a comarca da Ribeira Sacra.
Neste sentido, o Presidente explicou que o centro de maiores “será un activo moi importante para o concello, tanto a nivel social, como económico”, porque, como todas as residencias da Deputación, funcionará baixo “un modelo 100% público, centrado nas persoas, non na rendibilidade económica; que favorece o arraigo porque teñen prioridade no acceso ás prazas os propios veciños de Ribas de Sil, logo os da comarca e os do resto da provincia; e que dinamizará a economía porque se crean 25 postos de traballo directos, e todos os produtos e servizos que sexa posible compraranse na zona”. “Estamos satisfeitos porque cumprimos con Ribas de Sil, pero tamén con todos os veciños e veciñas da provincia, porque conseguimos o obxectivo que nos marcamos cando tomei posesión como Presidente da Deputación no ano 2019: ter abertas 9 residencias antes finalizar o mandato”, destacou José Tomé, ademais de “seguir avanzando durante estes catro anos nos proxectos para crear outros 9 centros, xa que a rede de residencias da Deputación contempla un total de 18”.
O mandatario provincial incidiu en que a institución fixo todo este esforzo técnico e económico coa única colaboración dos concellos, pois a Xunta de Galicia, a administración que por Lei ten as competencias en servizos sociais, non aportou nada nin para a construción, nin para o funcionamento dos centros de maiores. O modelo asistencial a persoas maiores que ten implantado a Deputación de Lugo está xa moi contrastado, funciona noutros 8 concellos e, ademais, está xerando un gran interese dentro e fóra de Galicia. De feito, a institución xa acudiu en tres ocasións á Semana Europea das Rexións e Cidades para explicar o seu modelo, e foi a única de toda España convidada á presentación celebrada na Moncloa do PERTE da Economía Social e dos Coidados.
A residencia de Ribas de Sil é a sexta que a Deputación pon en marcha no vai de mandato e a novena da rede provincial en funcionamento, xunto coas de Trabada, Pol, Ribadeo, Castroverde, A Fonsagrada, Pedrafita do Cebreiro, Meira e Navia de Suarna.•

Deixa unha resposta

Your email address will not be published.

Nova Anterior

O programa «Coidados Porta a Porta» visitará de novo o Concello de Bóveda

Seguinte Nova

Sarria adxudica 780.000 € en obras de abastecemento de auga que beneficiarán a preto de 1.000 veciños

Últimas noticias sobre SALUD

A %d blogueros les gusta esto: