O director da Axencia Galega da Calidade Alimentaria, José Luis Cabarcos, visitoru dúas adegas nas denominacións de orixe Ribeira Sacra e Rías Baixas acompañado do alcalde de Sober, Luis Fernández, co obxectivo de poñer en valor as posibilidades do sector vitivinícola como elemento dinamizador do territorio e creador de riqueza. Unhas posibilidades que se busca potenciar -lembrou- ao abeiro da Estratexia de dinamización económica, territorial e turística das comarcas vitivinícolas de Galicia, que se artella en 46 medidas e 299 accións estruturadas en sete eixes estratéxicos.
Primeiramente, o director visitou esta mañá as Bodegas Petrón, situadas no corazón da Ribeira Sacra e que contan con diferentes viñedos nas ribeiras do río Sil. Destacou que esta adega obtivo o Acio de Ouro ao mellor tinto de Galicia nas tres últimas edicións das Catas dos viños, augardentes e licores tradicionais, polo seu viño Prómine Singular. Así, recordou que este evento, organizado pola Consellería do Medio Rural e polos consellos reguladores, ten como obxectivo promocionar, identificar e premiar os mellores produtos elaborados fundamentalmente con uvas de variedades autóctonas, dotados dun carácter único e dunha personalidade recoñecible dentro e fóra da nosa comunidade.
Pola tarde, o director visitará tamén o Pazo de Rubianes, situado en Vilagarcía de Arousa, que conta cunha pequena adega e que destaca como proxecto enoturístico na denominación de orixe Rías Baixas. Neste sentido, cabe salientar que organizan diferentes visitas e eventos nos que o viño é o eixe central, como fórmula para poñelo en valor como elemento diferenciador e definidor do territorio.
Precisamente, a do enoturismo é unha das follas de ruta marcadas ao abeiro da Estratexia de dinamización económica, territorial e turística das comarcas vitivinícolas de Galicia -elaborada en colaboración coa Fundación Juana de Vega-, que busca consolidar o sector nos mercados nacional e internacional e potenciar tanto a imaxe de marca e identidade como o turismo vinculado aos territorios onde se producen.
Para conseguilo, a Estratexia contempla accións de cara a incidir tamén na produción, na industrialización, nos mercados, na promoción ou no patrimonio natural, cultural e paisaxístico.•
