O brindo é un xénero de improvisación oral cantada, propio de terras da Pobra do Brollón así como doutras zonas da montaña lucense e mesmo do Bierzo. O Concello da Pobra do Brollón inicia este venres 27 unha serie de obradoiros para aprender a arte do brindo. Serán a cargo de Sara Marchena e Alba María. Alba María naceu en 1995 nas Palmas de Gran Canaria onde pasou os primeiros anos da súa infancia. A música canaria influíulle moito na súa carreira musical mais sería a súa avoa de Tuiriz (Lugo) a que a animou ao canto. Estudou música no CMUS de Vigo e participou en diversos certames de poesía e improvisación, sendo unha destacada poeta e regueifeira. Pola súa banda Sara Marchena naceu e estudou en Vigo, graduouse en lingua e literatura galegas. Sara iniciouse na regueifa a partir duns obradoiros que impartían no seu instituto. Isto motivouna a comezar a impartir obradoiros pola súa conta.
Cada mes, haberá un obradoiro nun bar diferente do municipio. Están orientados a todos os públicos e todas as idades, con ou sen experiencia na improvisación.
O ciclo comeza hoxe venres ás 20:15 no Bar Pirata, coa participación a maiores de dúas convidadas, Nuria Penas e Lorena Medela, pertencentes á nova xeración de regueifeiras.
O mesmo venres á tarde, Sara e Alba impartirán un obradoiro no colexio da Pobra do Brollón, aínda que os nenos e nenas poderán tamén asistir ao obradoiro aberto despois no bar.
“Estes obradoiros forman parte dun conxunto de actividades que desenvolveremos ao longo do ano arredor do brindo e da improvisación oral,” comenta o técnico de cultura, Xosé Gago. “Queremos facer comunidade recuperando e traendo á contemporaneidade este patrimonio inmaterial guímaro.”
O brindo tradicionalmente asóciase ás vodas, e as súas estrofas improvisadas usábanse
polo xeral para o eloxio ou a homenaxe. Nos obradoiros de brindo búscase respectar a esencia e estrutura, aínda que ampliando e variando o seu ámbito de aplicación e uso.•
Cargando ...
