A deputada por Lugo, Carme Aira denunciou o illamento do Courel agravado polas actuais condicións das estradas e un “deficiente” transporte público que obriga ás persoas que non conducen a depender dos seus familiares ou de transporte privado nos seus traslados.
A parlamentaria do BNG insistiu nas difíciles condicións de vida en O Courel cunha poboación de elevada idade, agraria, con recursos limitados, persoas soas e na súa maioría mulleres. Á falta de servizos de mobilidade sumou “a falta de servizos básicos xerais para a poboación do concello tal como se pode demostrar co censo poboacional e a perda continúa de poboación”. O Caurel está illado por aspectos estruturais e falta de servizos de transporte, polo tanto, “dúas veces illado”. É incompatible vivir no Courel e traballar fóra , sinalou Aira, é un dos motivos, “non menor”, polo que o Caurel perde poboación e non se fixe poboación xoven. Toda esta zona ten dificultades para trasladarse en transporte público, con rutas e horarios suficientes e a prezos asumibles.•
