Cumpríronse xa dez anos desde que un chantadino afincado en Barcelona, cidade na que levantou o imperio hostaleiro que é hoxe o Grupo Hotusa, tomou unha das decisións estratéxicas máis audaces e arriscadas que se viron, ao decidir establecer na súa terra natal, Chantada, a sede de varios departamentos da compañía, sede na que agora traballan máis de 200 profesionais, a maioría mozos menores de 30 anos cunha elevada cualificación.
E para conmemorar este aniversario o Grupo Hotusa celebrou no auditorio de Chantada un acto institucional que reuniu a 200 persoas entre os que se achaban os empregados da oficina, personalidades do panorama institucional e representantes do empresariado local. O acto contou coa participación do presidente do Consello Económico e Social de España, Antón Costas; o alcalde de Chantada, Manuel Lorenzo Varela; a vicepresidenta segunda do Congreso dos Deputados, Ana Pastor; o presidente da Xunta de Galicia, Alfonso Rueda Valenzuela; o conselleiro executivo da Corporación Hijos de Rivera, José María Rivera Trallero; e o presidente de Grupo Hotusa, Amancio López Seijas.
O presidente de Grupo Hotusa foi o encargado de iniciar a quenda de parlamentos onde, tras agradecer a asistencia aos invitados e, en especial aos empregados da compañía, destacou que desde que naceu o proxecto, a idea da que se partía era crear algo que tivese continuación no tempo. López continuou matizando “desde o primeiro momento quixemos xerar na persoal orgullo de pertenza e compromiso, non só coa compañía se non tamén coa terra, Chantada.
Buscabamos comprometernos coa transformación da comarca e xerar novas oportunidades. E conseguímolo, hoxe contamos nesta sede con directivos e equipos imprescindibles para a compañía, un persoal cun enorme futuro que nos garante a continuación no tempo do proxecto, facéndoo sostible”.
Tras esta intervención, realizouse unha mesa redonda composta polo conselleiro executivo de Corporación Hijos de Rivera, José María Rivera; o presidente do Consello Económico e Social de España, Antón Costas; e o presidente de Grupo Hotusa, Amancio López Seijas, na que compartiron as súas visións sobre como a través da actividade empresarial, pódese atopar un novo futuro para a Galicia rural.
Despois interviu o alcalde de Chantada, Manuel Lorenzo Varela, quen manifestou con orgullo como unha gran empresa como Grupo Hotusa fixo que a zona creza e tamén destacou o papel que desempeñou o Concello no últimos seis anos e a participación que tivo en eventos importantes.
En materia urbanística, explicou como o establecer a sede principal da empresa fixo que a cidade creza e construíronse máis vivendas. Para finalizar a súa intervención, o alcalde agradeceu aos traballadores de Hotusa e a empresarios desexándolles “moitos éxitos”.
Pola súa banda, a vicepresidenta segunda do Congreso dos Deputados, Ana Pastor, tamén quixo felicitar persoalmente ao presidente da compañía polo afecto, ilusión e empuxe total que dedicou a esta sede desde os seus inicios e o seu gran labor neste sentido: “Neste X aniversario, eu poñería en valor a gran capacidade de xestión, o carácter aberto e dialogante e a actitude propositiva que ten que ter un bo empresario e que, a pesar das dificultades como as que viviu o sector estes últimos anos, o proxecto seguiu adiante porque creu que as persoas e a iniciativa merecían a pena. Crear parte dun holding empresarial en Chantada foi todo un éxito porque un bo proxecto contaxia ao que ten ao redor e é motor de riqueza da contorna onde se fixa”.
Finalmente, o presidente da Xunta de Galicia, Alfonso Rueda, foi o encargado de pechar este acto cun discurso no que quixo agradecer persoalmente ao presidente de Grupo Hotusa por desenvolver unha iniciativa de tal importancia tanto a nivel económico como social na zona: “O éxito de Hotusa en Chantada non só demostra que é posible emprender grandes proxectos desde o rural, senón que con estas iniciativas todos saen gañando: a empresa, que pode realizar perfectamente o mesmo traballo que nunha gran cidade a menor custo, e toda a contorna, que se beneficia da xeración de emprego e dinamización da economía que implica a chegada deste tipo de iniciativas.
Aínda que é un éxito colectivo, permítanme que destaque o labor de Amancio López, un galego que exerce de galego, sen quen isto non sería posible”.•
