O Diario Oficial de Galicia (DOG) vén de publicar a resolución da Axencia Galega da Industria Forestal, dependente da Consellería do Medio Rural, pola que se convocan axudas destinadas aos investimentos en tecnoloxías forestais, procesamento, mobilización e comercialización de produtos. Esta convocatoria de achegas ten un orzamento total de 9 millóns de euros e poderán beneficiarse dela as microempresas, medianas e pequenas empresas (pemes) do sector forestal radicadas na nosa comunidade.
Como feito destacado, cabe mencionar que por primeira vez se establecen cinco liñas definidas para asegurar o investimento en maquinarias para a silvicultura, para o aproveitamento comercial da castaña e da resina ou para a clasificación estrutural de madeira. O principal obxectivo é impulsar a industria forestal-madeira e mellorar a competitividade das pequenas e medianas empresas galegas. A primeira liña das axudas contempla todo o relativo á xestión forestal activa, un piar fundamental en materia de desenvolvemento rural. A segundarefírese á madeira e a biomasa. A terceira liña dedícase á maquinaria específica ou equipamentos que permitan un aproveitamento comercial da castaña ou da resina no monte, así como ao acondicionamento e instalacións de parques intermedios de almacenamento e/ou clasificación. A cuarta liña dedícase ao valor engadido na primeira transformación da madeira. . A quinta e última liña abrangue os plans e ferramentas de xestión empresarial Estas axudas enmárcanse na Axenda de impulso da industria forestal-madeira, no Plan Forestal 2021-2040 “Cara á neutralidade carbónica” para potenciar o sector e impulsar a bioeconomía.•
