Arrancou con forza a nova temporada dos catamaráns da Deputación de Lugo pola Ribeira Sacra, pois só na primeira semana dende que se abriu a venda de billetes, xa hai 7.500 prazas reservadas. Pilar García Porto, Deputada de Réxime Interior, Promoción do Territorio e Turismo declarou que “seguimos consolidando as rutas fluviais pola Ribeira Sacra como un reclamo de primeira orde para incentivar así a actividade económica, e facémolo a través do modelo de turismo polo que traballamos dende a Deputación, sostible, de calidade, de experiencias, que coida o patrimonio e que deixa valor no territorio”. A Deputación ofrece a ruta Canón do Sil, que parte do embarcadoiro Ponte de Sil, en Monforte, e a Ruta do Cabo do Mundo, que sae de Belesar, no Saviñao. A viaxe polo Miño conta con preto de 1.200 reservas, e as restantes, unhas 6.300, son viaxes que se farán polo Sil. As reservas poden facerse a través da páxina web reservas.rutasembalses.es na que, ademais, as persoas interesadas poderán coñecer todos os detalles das diferentes viaxes. O portal posto en marcha o pasado ano pola Deputación ofrece a posibilidade de modificar as reservas, coñecer a normativa vixente e coñecer toda a información precisa para realizar a viaxe. •
