Chegan as eleccións municipais en Galicia, levamos xa desde o ano 1977 acudindo ás urnas, case cincuenta anos, pero sempre aparece algún episodio máis propio dunha película de Berlanga que da realidade do moderno país que somos. E esta vez, a historia ten lugar en Samos, o concello da comarca de Sarria que apenas supera os 2000 habitantes, e que con todo acaparou titulares nos últimos días, pois ten un alcalde desde 2007, Julio Gallego, que levaba tres maiorías absolutas co PSdeG-PSOE, e que anuncia que decide dar un paso atrás e retirarse da política, á vez que se comunica a candidatura do seu fillo Miguel Gallego, pero sorpresa, faio co Partido Popular. Como xa fixese o seu avó. A partir de aquí, ábrese a caixa dos tronos. O Secretario Xeral do Partido Socialista na provincia de Lugo, José Tomé, declaraba ao respecto da situación xerada que o Partido Popular “está volvendo ás andadas. Está fomentando o transfuguismo. Está comprando vontades, neste caso de persoas que, evidentemente, parece que non tiñan unha ideoloxía moi clara, porque se fora así non farían o que fixeron”. José Tomé foi moi crítico cunha forma de entender a política na que “unha familia debe de pensar que Samos lle pertence, que son os donos do Concello. O avó foi alcalde co Partido Popular, o pai co PSOE e agora parece que o fillo ten intención de ser polo PP. Isto non é unha dinastía”, recalcou o líder dos socialistas na provincia, “Samos é dos veciños de Samos”. A cousa chega a tal punto, que O Grupo Socialista de Samos acordou expulsar do mesmo a Julio Gallego, que pasará desta forma a ser Concelleiro non adscrito. Argumentan que a decisión débese ás declaracións e actuacións de Julio Gallego que califican“de extrema gravidade, incompatibles coa pertenza a este Grupo Municipal, asegurando incluso que apoiará a outra formación política de cara ás eleccións municipais do 28 de maio”.
Os socialistas ratificaron de novo o seu pleno apoio e confianza na candidatura á Álcaldía de José Antonio García Jurjo, “cun proxecto que ten como única prioridade o interese e o progreso de todos os veciños de Samos. Temos que pechar este esperpento e apostar por unha candidatura gañadora, que coloque a política municipal de Samos ó nivel que se merece, lonxe do Falcon Crest familiar que está montando o PP”.
Pola súa parte, Miguel Gallego, fillo do actual alcalde e candidato popular, declarou que“Imos traballar por aquilo que é posible facer e que xera benestar ao noso pobo”. O PP lucense sinala que “a nosa formación está a presentar candidatos solventes; pero iso parece que molesta ao secretario xeral dos socialistas na provincia que demostra a súa preocupación intentando facer descualificacións”.
Dende formación popular cren que “estas declaracións son froito do nerviosismo de Tomé por non ter os deberes feitos. •
Cargando ...
