• Ademáis, o vicepresidente primeiro e conselleiro de Economía, Industria e Innovación, sinalou que a Xunta está avanzando na tramitación das autorizacións e informes logo da calificación do proxecto como iniciativa prioritaria
Con expectación e optimismo séguese o día a día en relación co proxecto para a construción no Polígono do Reboredo de Monforte da nova planta de produtos farmacéuticos do grupo Kern Pharma. E é que, tal e como sinalamos nalgún artigo anterior, aínda que os monfortinos volvémonos, non sen motivo, especialmente desconfiados con este tipo de anuncios, este proxecto ten detrás a un monfortino emigrado a Barcelona, e sabemos que o apego con esta terra nunca se perde, é máis, tende a incrementarse desde a distancia. Por iso, hai confianza en que se materialice, e contribúa ao renacer económico dunha comarca especialmente maltratada no industrial no últimos trinta anos. É por iso que nos é grato trasladar a información recibida desde o concello de Monforte, na que nos confirman que o grupo farmacéutico xa solicitou a pertinente licencia para iniciar as obras, na súa primeira fase.
De feito, José Luis Diaz-Varela Somoza, Presidente de Kerm Pharma visitou recentemente Monforte xunto coa súa familia e tivo varios encontros co Alcalde, José Tomé, que o convidou a visitar os Monumentos da cidade e algunha bodega xunto cos viñedos.
Nas conversas que mantiveron analizaron o cronograma das obras para implantar a fábrica de medicamentos de Kerm Pharma na súa primeira fase e empezar xa coas actuacións que se levarán a cabo en breve en Monforte. Froito desas conversas xa se deron os primeiros pasos xa que Kerm Pharma solicitou a licenza de obra de forma telemática o pasado día 28 de febreiro ás 16:07 horas da tarde. Con data 3 de marzo, ás 11:24 horas tamén solicitou permiso por rexistro electrónico á Deputación Provincial de Lugo, dado que a futura fábrica de medicamentos linda coa estrada provincial de Monforte a Sober por Neiras, que é a via principal do Polígono e debe de contar con informe favorable preceptivo da Deputación.
Este proxecto tanto na Deputación como no Concello vai ter a consideración de proxecto prioritario o que lle permitirá ó Concello de Monforte concederlle a licenza dentro do presente mes de marzo en Xunta de Goberno. Aínda que os datos concretos do proxecto serán facilitados pola empresa, tal e como procura facer o Alcalde con tódolos proxectos empresariais, o comezo das actuacións será durante a presente primavera das que dará boa conta D. Raúl Díaz-Varela, Vicepresidente executivo do grupo Indukern e Presidente de Kerm Pharma, no transcurso dunha visita a Monforte que se producirá en breve, posiblemente a finais de marzo ou principios de abril.
Compre lembrar que o proxecto de Kerm Pharma está concibido para fabricar en catro áreas produtivas de medicamentos diferentes cando o proxecto estea completo, cun investimento de máis de 60.000.000 € e arredor de 100 postos de traballo.
Nesta primeira fase a licenza foi solicitada para un investimento de 31.193.572 € e unha creación de entorno aos 50 empregos. A implantación de Kerm Pharma en Monforte, laboratorio líder na produción de medicamentos, supón un impulso económico e social para a cidade de importancia capital.
Pola súa banda, o vicepresidente primeiro e conselleiro de Economía, Industria e Innovación, Francisco Conde, durante a súa visita á empresa monfortina Fenestra declarou que dende a Xunta «están avanzando na tramitación das autorizacións e informes que van permitir que nas vindeiras semanas o proxecto do Grupo Indukern na comarca poida comezar as obras de construción».•
