A subdelegada do Goberno, Isabel Rodríguez, visitou as instalacións de Abadía da Cova, de Adegas Moure

• A subdelegada sinalou que “é unha obriga das administracións impulsar a competitividade dos produtores vitivinícolas, mellorar os sistemas de produción sostibles e reducir a pegada ambiental deste sector produtivo”

A subdelegada do Goberno en Lugo, Isabel Rodríguez, recalcou no Saviñao a importancia da modernización da industria do viño na provincia, que xera riqueza e emprego, “para aumentar a competitividade dos produtores vitivinícolas, mellorar os sistemas de produción sostibles e reducir a pegada ambiental deste sector produtivo, consolidando, deste xeito, os viños da Ribeira Sacra nos mercados internacionais, que veñen de bater un récord histórico de exportacións, con máis de 280.000 litros vendidos na campaña de 2022”.
Isabel Rodríguez visitou este pasado luns as instalacións de Abadía da Cova, de Adegas Moure, onde puido coñecer in situ o funcionamento da mesma, desde a plantación da uva á recollida a man na vendima, pasando naturalmente polo proceso de produción e a súa posterior comercialización do viño, con Denominación de Orixe Ribeira Sacra.
A subdelegada manifestou que “é unha obrigación de todos apoiar a este tipo de empresas que optan pola excelencia e a calidade desde o respecto ao medio ambiente”. Neste sentido, sinalou que a achega desta e o resto de adegas da Ribeira Sacra é fundamental para a economía da provincia de Lugo, “por iso debemos potenciar tanto a imaxe de marca como o turismo vinculado aos territorios onde se producen, un elemento básico á hora de dar a coñecer a cultura e identidade da Ribeira Sacra fora das nosas fronteiras”.
Ao longo da súa visita Isabel Rodríguez puido comprobar da man do xerente, Evaristo Rodríguez, o marcado signo artesanal desta empresa que mantén desde as súas orixes unha estrutura empresarial familiar que fixo do coidado da materia prima, desde practicamente os seus inicios alá polos anos cincuenta do século pasado, un obxectivo estratéxico do seu negocio, e co que a día de hoxe comercializa unhas 350.000 botellas de vino ao ano e outras 250.000 de augardentes e licores, exportando a diferentes países europeos como Suíza, Alemaña, Austria, Finlandia ou Suecia, e a outros mercados como México, Canadá, USA ou China.
Nesta liña, a subdelegada quixo destacar a aposta das adegas da Ribeira Sacra pola innovación non só nas instalacións senón tamén no lanzamento de viños que buscan conectar cos gustos cambiantes e diferentes dos potenciais clientes, moi especialmente das persoas novas, obtendo produtos de excelente calidade. “Así o demostra Abadía da Cova que vén de recibir un “Gran Ouro”, outorgado pola Federación Española de Enólogos, por un dos seus viños brancos, evidenciando o recoñecemento e a calidade na elaboración dos viños do sur da provincia lucense”, subliñou Isabel Rodríguez.

Adegas Moure
A empresa lucense continúa o seu proceso de crecemento, traballando en 22 hectáreas do territorio, consolidándose como unha entidade innovadora e un referente dentro da Ribeira Sacra. Actualmente, conta con máis de 20 empregados, que traballan na adega de vinificación de viños novos, no laboratorio ou na adega de micro vinificación, onde se desenvolven os proxectos de I+D+i, entre outras instalacións. •