O concello de Pantón aprobou na última sesión plenaria o convenio coa Confederación Hidrográfica Miño Sil para poñer o colector en San Martiño de Pantón. Esta actuación permitará dar servizo de alcantarillado a todos os núcleos do municipio.
O convenio recolle un investimento en dúas anualidades de 1.036.000€, dos que a CHMS aporta 828.800€ e o concello de Pantón 207.200€. O convenio foi aprobado por unanimidade do pleno polo que o alcalde, José Luis Álvarez, amosa a súa satisfacción con este proxecto, por entender que suporá unha importante mellora do servizo para todo o municipio.
OUTRAS MELLORAS
Outras melloras que se executarán próximamente teñen que ver con importantes actuacións en rúas e beirarrúas. Investiranse 48.000€ na beirarrúa que sae do campo de Goián ao Lugar de Abaixo, 46.000€ no alfaltado e renovación de rúas en Ferreira, Goián e Toldaos. Melloraranse tamén rúas en Ramos, Segade e Seregude con 30.000€ e 45.000€ adicaranse a melloras en Serode, Panfulía, Casa do Conde, Casa Nova, Castillalbo en Tuiriz, Pereiro e Guimarás.
A mellora dos accesos á piscina, obra que non se puido executar con cargo ao Plan Único por incumprimento da empresa adxudicataria, executarase agora nunha parte que financiará o concello de Pantón con 43.000€, sendo o resto aportación do GDR Ribeira Sacra Courel.
Senda peonil
en Tuiriz
A conselleira de Infraestruturas e Mobilidade, Ethel Vázquez, salientou o investimento da Xunta de 329.000 € para dotar aos veciños de Toiriz, en Pantón, dunha nova senda peonil que se iniciará no verán. O anuncio fixoo Vázquez Mourelle ana parroquia de Santa María de Toiriz durante a presentación, xunto co alcalde, da nova actuación da Xunta en Pantón. Xa está en fase licitación as obras da nova senda de 530 metros a ambos os lados da LU-617, ao seu paso polo núcleo de Toiriz. As empresas interesadas teñen agora de prazo ata o 26 de abril para presentar as súas ofertas.
A titular de Infraestruturas da Xunta avanzou que as novas obras no núcleo de Toiriz, que suporán un investimento de preto de 329.000 €, prevén iniciarse no verán, polo que no primeiro trimestre de 2024 os veciños de Toiriz dispoñerán xa deste novo itinerario para realizar os seus desprazamentos cotiáns a pé de xeito cómodo, seguro e saudable.•
Cargando ...
