O Diario Oficial de Galicia (DOG) publicou o pasado 27 de marzo a orde de axudas da Consellería do Medio Rural para os plans de reestruturación e reconversión da viña en Galicia neste 2023, cun orzamento de 3 millóns de euros. O obxecto desta liña de achegas é aumentar a competitividade dos produtores vitivinícolas, mellorar os sistemas de produción sustentables e a pegada ambiental deste sector produtivo. Estas achegas aplicaranse ás superficies vitícolas onde se leven a cabo operacións de replantación de viñas, reconversión varietal e/ou melloras das técnicas de xestión das viñas.
Os beneficiarios poderán solicitar anticipos de ata un 80% da axuda aprobada, no caso de que precisen efectuar pagamentos inmediatos dado o investimento proxectado, sempre e cando constitúan unha garantía por un importe cando menos igual ao do pago anticipado. O prazo de presentación de solicitudes está xa aberto e prolóngase ata o 24 de abril. Neste período, os viticultores inscritos no rexistro da D.O. Ribeira Sacra poderán tramitar as axudas na sede do Consello Regulador da Denominación de Orixe Ribeira Sacra, sita en C/Comercio 6-8, 1º piso de Monforte. Pódese solicitar cita previa chamando ao teléfono 982 41 09 68. •
