O Consello da Xunta vén de aprobar o Proxecto de decreto de dependencia e que permitirá facilitar e simplificar o acceso a servizos e axudas.
“O obxectivo é reducir o papelame, eliminar duplicidades e acelerar o tempo ata que o dependente recibe a prestación”, indicou o Presidente da Xunta Alfonso Rueda, quen ademais resaltou que grazas a este novo marco normativo, que se enmarca no Plan de choque da dependencia que ten en marcha a Xunta, vai cambiar “sustancialmente” o procedemento para obter a valoracion do grao de dependencia ou a prestación correspondente.
O decreto vai incidir en tres aspectos. Por unha banda, a redución do número de documentos que deben presentar as persoas interesadas en obter un recoñecemento de dependencia. “De presentar unha ducia de documentos pasarase só a dous: un informe médico e un informe social”. En segundo lugar, unificará nun só procedemento a obtención dun recurso de dependencia, o de solicitude de recoñecemento de grao e o Programa individual de atención (PIA). Na actualidade ata que non se finalizaba a valoración do usuario e se lle recoñecía un grao de dependencia non se realizaba o PIA. “Agora vaise tramitar todo o mesmo tempo”, indicou Rueda.
E en terceiro lugar, redefinirase o concepto PIA para facelo máis completo e duradeiro. Deste xeito, o programa comportará unha prestación económica pública e incluirá alternativas ao servizo preferido no caso de que a primeira opción do solicitante non conte con prazas dispoñibles. Os usuarios con o PIA aprobado e que non teñan acceso nese momento ao servizo solicitado poderán recibir xa desde o inicio a prestación económica.•
Cargando ...
