Consideran os populares de Pantón que no convén cambiar aquelo que funciona, e por iso o PP presenta en Pantón unha lista para as eleccións locais que se celebrarán o próximo día 28 na que están as mesmas persoas que gobernan o municipio, con José Luis Álvarez Blanco, de novo, como candidato a repetir na alcaldía, cargo que desempeña dende 2007. A idea dos populares é concluír as obras xa iniciadas e aquelas que están programadas para dar a Pantón as infraestruturas e os servizos que merecen os seus veciños. O aspirante á alcaldía é afiliado ao PP dende 1990 e foi o fundador, en 1991, do Partido Popular en Suíza.
A TRAÍDA DE AUGA
Álvarez Blanco ten moi claras as prioridades para o próximo mandato; as infraestruturas hidráulicas ocupan lugar moi destacado entre elas. Así, o candidato a repetir na alcaldía destaca a prevista execución das obras para a traída de auga en San Vicente de Castrillón, Santiago de Castrillón e Santo Estevo do Mato. Na folla de ruta dos populares para o próximo mandato está tamén a traída de Ribeiras de Miño. Indican igualmente que no programa popular figura a asunción polo Concello das traídas locais naqueles casos que así se solicite.
Avanzar con rapidez no saneamento rural é outra das propostas da candidatura popular, co fin de que a finais do mandato estea practicamente rematado na súa totalidade. De momento, programan os colectores de Toiriz, Moreda e Eiré. Está listo o convenio coa Confederación Hidrográfica para o colector de San Martiño de Pantón.
En materia social, a folla de ruta dos populares inclúe dúas residencias coa fundación San Rosendo, unha das cales xa ten licenza; para a outra, será preciso que o Concello tramite un plan especial para posibilitala urbanisticamente. O candidato a repetir na alcaldía lembra que está pendente a construción pola Deputación dunha residencia da terceira idade; asegura que seguirán apostando polos servizos sociais e mantendo o de madrugadores.
Por outro lado, os populares xestionarán o polígono industrial, ao entender que a Deputación non o levou a cabo, pese a consignar durante varios anos un millón no seus orzamentos para este fin. Convencido de que a Deputación será gobernada polo PP, Álvarez Blanco asegura que serán os populares os que crearán este polígono industrial. •
