José Tomé Roca revalida a maioría absoluta en Monforte

Os socialistas perden un concelleiro, o PP mantense con catro, o BNG sube a dous e Esperta Monforte terá un representante no concello

José Tomé Roca conservará unha folgada maioría absoluta no concello de Monforte, a pesar de perder un concelleiro e 400 votos respecto a as pasadas eleccións municipais. A baixada en votos dos socialistas monfortinos hai que matizala, pois realmente tamén baixou o número de votantes, de forma que porcentualmente, o descenso apenas é significativo. En 2019 os socialistas conseguiron o 55,60% dos votos e agora o 54,72%. Moi pouco foi o desgaste que sufriu pola súa acción de goberno. Non é menos certo, que o poder político adquirido polo alcalde monfortino nestes catro anos, liderando aos socialistas da provincia e exercendo como Presidente da Deputación, outorgoulle unha alta valoración entre o electorado monfortino, por outra banda, tradicionalmente conservador no referente á reelección dos seus alcaldes. Todo o mundo daba por feito esta vitoria socialista, así o estimaban as enquisas, pero non por iso debe obviarse o mérito da mesma e o valor que para a súa consecución tivo o traballo e resiliencia do seu líder José Tomé Roca. A capacidade de manterse firme nas súas formulacións cando os electores parecían darlle as costas durante os mandatos de Severino Rodríguez e o BNG. E tamén o seu esforzo en conseguir atraer para Monforte proxectos empresariais, que agora parece que ao fin verán os seus froitos. E aínda que foi moi criticado pola oposición respecto a algunhas das súas propostas para a cidade, como o cambio da pasarela do Malecón por unha nova ponte, o abuso do asfaltado ou o recente anuncio da praia fluvial, o certo, é que non foi capaz a oposición de canalizar a resposta cidadá e convertela en votos que lles desen opción de ser unha alternativa real aos socialistas. Katy Varela e o PP melloraron os seus resultados subindo 177 votos, pero insuficientes para conseguir máis concelleiros. O BNG foi o único conseguiu un concelleiro máis grazas á subida de máis de 300 votos que logrou, en boa medida polo traballo día a día do seu candidato Emilio Sánchez, e polo tirón do BNG e Ana Pontón a nivel galego. Germán Vázquez e Esperta Monforte conseguiron manter a súa presenza no concello, aínda que de forma moi axustada, co 5,83% dos votos, deixándose polo camiño 370 respecto ao 2019, moitos dos cales seguramente foron a parar ao BNG.
Haberá pois, continuidade no concello, os proxectos en marcha seguirán o seu curso, previsiblemente, durante os próximos catro anos. Un xeito de facer política que parece ter o visto e prace dos monfortinos. O que está por ver é se José Tome manterá o seu poder e influencia política, pois os tempos que veñen parecen convulsos para os socialistas. Aínda que en Lugo manterán o poder na Deputación, en coalición co BNG, algúns rumores alertan sobre a posibilidade de que o alcalde monfortino non repita como Presidente da Deputación. E no goberno central, parece que se achegan nuboeiros para Pedro Sánchez, que se viu obrigado a convocar eleccións anticipadas. Terá Monforte un alcalde que goberne a Deputación? E un goberno central socialista que apoie os seus proxectos de futuro? Paciencia, en pouco tempo saberémolo.•

Deixa unha resposta

Your email address will not be published.

Nova Anterior

Claudio Garrido gaña as eleccións en Sarria

Seguinte Nova

O PP de Quiroga perde a maioría absoluta

Últimas noticias sobre POLÍTICA LOCAL

A %d blogueros les gusta esto: