A subdelegada do Goberno en Lugo, Isabel Rodríguez, informou que o Servizo Público de Emprego Estatal (SEPE) vén de implantar na provincia de Lugo o sistema “Distrito único”, que posibilita que os usuarios do SEPE poidan pedir cita e ser atendidos en calquera das once oficinas de prestacións da provincia, con independencia do seu domicilio.
Tal e como indicou a subdelegada, ata o de agora, cada cidadán tiña asignada unha oficina en función do distrito onde tiña a súa residencia. Con este novo plan, as persoas usuarias que desexen realizar trámites de prestacións e subsidios xestionados polo SEPE poden solicitar cita previa en calquera das oficinas da provincia.
Os cidadáns poden solicitar cita, ben a través de Internet, na páxina web Cita Previa (www.sepe.gob.es ), ou ben por teléfono. Se o fai por Internet, o sistema móstralle as citas dispoñibles nas oficinas. Tamén se pode elixir o criterio de proximidade, segundo a distancia ao domicilio, e pódese escoller aquela que máis conveña.
Cada día, ás 9:00 horas, ábrense novas citas e o cidadán ten a opción de conseguir a que máis lle interese. O organismo ofrece atención física nas oficinas de emprego situadas en Lugo, Becerreá, Burela, Chantada, Mondoñedo, Monforte de Lemos, Ribadeo, Sarria, Vilalba e Viveiro. •
Cargando ...
