A Feira Guímara conmemora a revolta dos habitantes da Pobra do Brollón contra o Conde de Lemos cunha completa programación dende o mediodía ata a noite no campo da feira, ao carón do río Rubín.
A xornada arranca ás 13:00 co pregón a cargo da bailarina e actriz Merche Pérez e o escritor Manuel Ayán. Seguidamente, haberá unha representación escénica da obra O Piñeiro Máxico, a cargo do alumnado do curso de teatro infantil dirixido pola propia Merche Pérez.
Despois, tras a xa tradicional representación da revolta guímara a cargo da veciñanza, comezará un vermú animado pola agrupación Os Ministreles do Burgo. A programación continúa despois do xantar cun concurso de xogos populares que terá lugar de 17:00 a 19:00h. As persoas interesadas en participar nos distintos xogos (ra, tira soga e chave) deben anotarse previamente. Haberá categorías infantil e adultos.
Á noite, a partir das 21:00 h, empezarán os concertos, coa agrupación de música tradicional festeira Airiños da Freba, e o grupo de rock bravú de Chantada, Os Rastreros. Despois dos concertos, espérase que se forme foliada, polo que dende a organización animan aos asistentes a levar instrumentos.
Concursos de caracterizacións e estandartes
Nesta oitava edición da Feira Guímara haberá premios para as mellores caracterizacións e os mellores estandartes. A idea é que estean relacionados con lendas guímaras ou con calquera momento da historia da Pobra do Brollón. Hai varias categorías, individuais e colectivos, e infantís e adultos. Para participar é preciso inscribirse previamente. As caracterizacións e estandartes valoraranse o mesmo día da Feira e anunciaranse os gañadores ás 21:00 h, antes do comezo dos concertos.
Postos e comida
Ao longo da xornada da Feira haberá postos de artesanía e produtos locais, e tamén postos de comida. Para o xantar, haberá unha polbeira e ademais tres restaurantes da Pobra do Brollón (Bar Avenida, A Vella Taberna e O Primeiro de Maio) ofrecerán menús para levar.•
