Xa estamos ás portas da tradicional Subida a Chantada, que este ano chega á súa 49 edición, e disputarase os días 14, 15 e 16 de xullo. E trae novidades. Entre elas, a cobranza dunha entrada de 5 euros. Unha medida que, segundo a organización, faise necesaria para abordar unha proba destas características, e piden comprensión aos afeccionados.
“O alto custo de organización dunha proba destas características fai que cadrar os orzamentos sexa sempre moi difícil. Co apoio das institucións e patrocinadores avánzase moito, pero sempre é insuficiente para lograr pechar as contas” comenta Alfonso Viana, o presidente do comité organizador da cita do Campionato de España de Montaña.
“Somos conscientes de que hai afeccionados aos que non lles agrada o ter que pagar por gozar dunha proba automobilística, pero teñen que ser consecuentes de que o gran espectáculo do que van gozar é moi custoso en todos os apartados para o organizador e que é precisa esa colaboración económica. Serán 5 euros, algo que cremos non deixa de ser un prezo simbólico que virá moi ben á organización para poder cubrir os custos” remata o responsable da Subida a Chantada. Por contra, a organización xa confirmou que tanto Christian Merli como Alexander Hin xa están inscritos con senllas Osella FA 30. O italiano Christian Merli é o actual líder do Campionato de Europa de Montaña, e é que o piloto de Trento logrou a vitoria en todas as probas disputadas ata a data nese certame esta tempada, sendo no campionato continental un directo rival do español Joseba Iraola que se espera estea tamén presente en Chantada os días 14, 15 e 16 de xullo próximos. Tamén realizou a súa inscrición o alemán Alexander Hin, outro deportista de talla internacional que ocupa a cuarta posición na táboa continental con outra Osella FA 30. A presenza dos mellores pilotos europeos e nacionais de montaña dará un aliciente moi especial á 49 Subida a Chantada, converténdose así nunha proba de máximo nivel de competitividade e sobre todo de espectáculo, o poder gozar no ascenso pola ribeira chantadina.•
Cargando ...
