Nun pleno extraordinario celebrado esta semana, que contou cos votos a favor de socialistas e populares, e coa abstención de Esperta Monforte e BNG
O pasado 5 de xullo, celebrouse un pleno extraordinario do concello de Monforte, para, por unha parte, decidir sobre a bonificación do ICIO a Oviganic Ibérica e por outra a aprobación da modificación da ordenanza fiscal do ICIO, artigos 7, apartado b.
En primeiro lugar aprobouse o carácter extraordinario do pleno. Unha vez aprobado, comezouse a tratar o tema relativo á bonificación do ICIO a Oviganic. A proposta era aprobar unha bonificación do 95% do ICIO que a empresa tería que abonar polas obras de ampliación que vai acometer. A liquidación do imposto ascendía a 320.151,38 €, e segundo a ordenanza, ao xerar co investimento máis de 6 postos de traballo (15 novos postos xerarase logo do investimento), procede bonificar o 95%, é dicir 320.151,38 €, polo que Oviganic Ibérica, deberá pagar 16.850,07 €. Os portavoces de BNG e Esperta Monforte, quixeron deixar claro as súas dúbidas respecto a que o novo investimento a levar a cabo por Oviganic, estivese dentro do establecido pola ordenanza. Literalmente, Emilio Sánchez, portavoz nacionalista, sinalou que é posible que esta interpretación extensiva, estivese a rozar a prevaricación. O Alcalde José Tomé Roca, discrepou desta interpretación, e considerou que se está a aplicar literalmente a norma. Finalmente e a pesar destas disquisiciones, a bonificación foi aprobada cos votos a favor de PSdeG e PP, e a abstención de BNG e Esperta Monforte. O último punto da orde do día facía referencia á modificación da ordenanza fiscal do ICIO, para dar cabida á bonificación a un novo proxecto empresarial que se instalará en Monforte, e que polo tipo de actividade a desenvolver non podería implantarse nin no Polígono do Reboredo nin no Porto Seco de Monforte, áreas nas que ata o de agora era necesario implantar os novos proxectos empresariais para ser susceptibles de bonificación. O proxecto exposto por Acios Glamping & Wine SL xerará 7 postos de traballo. Esta modificación terminou sendo aprobada cos votos de PSdeG, BNG e Esperta Monforte, e coa abstención do PP.
APOIO DA XUNTA A OVIGANIC
A Xunta apoia a ampliación e a incorporación de novas liñas de produción na empresa láctea Oviganic, que foi declarada iniciativa empresarial prioritaria polo Goberno galego. Na práctica, supuxo reducir á metade os prazos de tramitación para levar a cabo o proxecto.
A Consellería do Medio Rural achegou máis de 3 millóns de euros á empresa a través do programa de apoios para os investimentos en transformación e comercialización de produtos agrarios, dos que abonou o pasado mes de maio 1,2 millón de euros correspondentes á ultima anualidade. Actualmente tramita unha nova solicitude presentada ao abeiro da convocatoria deste ano.
A multinacional láctea recibiu en concreto 3.031.460,88 euros para a factoría monfortina mediante esta liña de incentivos, impulsando un investimento global de 13,7 millóns de euros.•
