A asemblea de traballadoras e traballadores do Hospital de Monforte convocada pola CIG-Saúde o mércores da pasada semana acordou iniciar mobilizacións contra desmantelamento do centro hospitalario, reclamar un reforzo de persoal e que se cubran todas as vacantes de especialistas.
A primeira das protestas tivo lugar oeste xoves, 20 de xullo, cunha concentración ás 12h diante do hospital.
A CIG-Saúde promoveu a asemblea e a convocatoria de mobilizacións ante a gravidade «do que está a pasar, sobre todo para a cidadanía». «Temos que evitar que se siga desmantelando o hospital deste xeito», salientan, e por iso a central nacionalista fai un chamamento tanto ao persoal como a veciñanza de Monforte para que se sume ás movilizacións.
UNHA GRAN MANIFESTACIÓN
Neste camiño, na asemblea tamén se acordou convocar a Xunta de Persoal para recoller o maior número de apoios ás accións que se leven a cabo, dirixirse ao Concello para que convoque o Consello de Saúde e contactar coa Plataforma en Defensa da Sanidade Pública para que apoien as movilizacións, e para promover unha gran manifestación á volta do verán «ante a deriva que está tomando do hospital».
CARENCIAS DE ESPECIALISTAS
No relativo ás carencias de especialista, que a CIG-Saúde leva meses denunciando, Vicente Vázquez lembrou que faltan dúas hematólogas -repartíndose o seu traballo entre diversos profesionais-; non hai especialista de dixestivo -faise cargo destas consultas medicina interna-, nin tampouco de rehabilitación. Neste caso, apunta, «o único que hai son uns protocolos feitos polo persoal de rehabilitación de Lugo en consenso co de fisioterapia, pero descoñecemos quen fai o seguimento dos/as doentes, nin se funciona o tratamento ou quen lle dá a alta».
DERIVACIÓN DE DOENTES A CLÍNICAS PRIVADAS
Advirte que se están derivando moitos/as doentes á privada, concretamente ao Polusa, sen ter en conta os trastornos que estes desprazamentos a Lugo lle provocan ás persoas doentes. E por non fora abondo, «seguimos sen ter especialista en neuroloxía propio (veñen do HULA), ao igual que o cardiólogo e dúas pediatras».
CARGA DE TRABALLO ADMINISTRATIVO
Según o representante sindical da CIG-Súde, este déficit de profesionais acaba repercutindo tamén sobre o persoal administrativo, «xa que teñen que reprogramar todas as citas suspendidas da maior parte destes servizos. O persoal está totalmente desbordado, porque xa tiñan traballo dabondo e agora teñen que reprogramar todas as citas tanto de hematoloxía coma de rehabilitación e aínda por enriba cando piden un día non os cobren».•
