O cabeza de lista do PSdeG-PSOE ao Congreso por Lugo, José Ramón Gómez Besteiro, mantivo xunto co Alcalde, Presidente da Deputación e Secretario Xeral dos socialistas na provincia, José Tomé Roca, un encontro co tecido empresarial monfortino.
“Con Pedro Sánchez e José Tomé, Monforte converteuse no modelo de desenvolvemento da Galicia interior”. Así o manifestou o cabeza de lista do PSdeG-PSOE ao Congreso por Lugo, José Ramón Gómez Besteiro, que mantivo a pasada semana, xunto co Alcalde, Presidente da Deputación e Secretario Xeral dos socialistas na provincia, José Tomé Roca, un encontro co tecido empresarial monfortino.
“Monforte está vivindo un enorme auxe industrial, en infraestururas e turístico, e medra como se merece, grazas ás políticas dos Gobernos socialistas do Estado e do Concello”, asegurou Besteiro, que estivo acompañado pola número 2 ó Congreso, Patricia Otero, e polo candidato ó Senado César Mogo. Como exemplos, Gómez Besteiro puxo a ampliación do polígono industrial do Reboredo a máis do dobre da súa extensión tras esgotarse as parcelas, a creación do centro de ciberseguridade de Renfe, pioneiro en Europa, ou a implantación de firmas punteiras como Kern Pharma. “Este é o resultado dunha xestión que fai de Monforte un referente en crecemento e dinamismo que crea emprego e contribúe de maneira moi importante a asentar poboación”. E, fronte a isto, a nula política industrial da Xunta, que ten os cartos e as competencias, pero non fai nada”.
O Goberno de Pedro Sánchez inxectou na cidade do Cabe 20M€ en investimentos directos para infraestruturas e servizos, ao que hai que engadir o presuposto histórico de 546M€ que dedica para a modernización da liña ferroviaria Monforte-Lugo-Ourense.
O parque empresarial foi a primeira parada dos socialistas, onde coñeceron a actividade e instalacións de Fenestra, empresa relacionada coa industria do aluminio, que se encontra en pleno crecemento, con novos investimentos previstos e a creación de máis empregos. Tamén visitaron a láctea Oviganic Ibérica (antiga Danone), tamén en fase de expansión cun investimento de case 20M€, e Ramiro Vila e Hijos, firma de mecanizados de fabricación de maquinaria e componentes industriais destinados á exportación nacional e internacional.
Tras a visita ó polígono, os candidatos ao Congreso e ao Senado e o Alcalde mantiveron un xantar de traballo cunha trintena de directivos e representantes do tecido empresarial de Monforte relacionado coa industria, o comercio, a hostalería e o mundo do viño, e tamén coñecerán diferentes establecementos integrados no Centro Comercial Urbano.
O número 1 da lista socialista ó Congreso destacou que o Goberno de Pedro Sánchez “puxo de novo a Monforte e ao conxunto da provincia de Lugo no mapa das infraestruturas do Estado, de onde o borrou o PP cando gobernou en Madrid”.
Así, «mentres o PSOE de Pedro Sánchez impulsa cun investimento histórico de 546M€ a modernización do tren para que a Alta Velocidade chegue a Lugo, o PP ten varado o Porto Seco dende hai décadas, o símbolo do desprezo de Feijóo e Rueda á Galicia interior”.•
Cargando ...
