Risco extremo de incendio en todo o sur de Lugo. Así se observa no índice de risco de incendio forestal (IRDI) que é publicado diariamente pola Consellería do Medio Rural. Para establecer ese índice de risco diario tense en conta a conxunción dos seguintes factores: a situación meteorolóxica, o estado da biomasa vexetal, o das infraestruturas preventivas, das masas arbóreas e o do chan. Esta ameaza xa se deixou notar na comarca de Quiroga, con dous incendios, que afortunadamente xa están controlados, aínda que calcinaron unhas 26 hectáreas. A estación meteorolóxica que Meteogalicia ten na Conchada chegou a rexistrar ás tres da tarde 45´02º. O primeiro dos incendios iniciábase a primeira hora da tarde entre Centeais e Ferreira.No lume que se daba por controlado ás once da noite participaron tres técnicos, nove axentes, 17 brigadas, 14 motobombas, una pala, oito avións e seis helicópteros. Pasadas as oito do serán alertábase doutro incendio en Carballo de Hospital. O lume que conseguiu controlarse sobre as catro da mañá arrasou unhas 7 hectáreas de terreo, maiormente arborado. O lume iniciouse en varios puntos distintos a pouca distancia entre si ao longo dunha pista, o que indica a súa intencionalidade. No operativo traballaron un técnico, cinco axentes, 12 brigadas, oito motobombas, una pala, unha unidade técnica de apoio, catro avións e tres helicópteros, que tamén participaran no incendio da parroquia de Montefurado. Ata Carballo achegáronse o alcalde de Quiroga, José Luis Rivera, e varios Concelleiros do equipo de Goberno, para saber cal era a situación e si se precisaba algunha axuda por parte dos servizos municipais. A brigada antiincendios municipal que non traballaba por estar de descanso presentouse voluntaria e colaborou na extinción.•
Cargando ...
