A primeira tenente de alcalde de Monforte, Gloria Mª Prada Rodríguez, acompañada pola vicepresidenta da Fundación Juana de Vega, Teresa Táboas, pola concelleira de Cultura, Mariña Doutón, e o concelleiro de Obras, Medio Rural, Servizos e Medio Ambiente, José Luis Losada, inauguraron na Casa da Cultura Poeta Lois Pereiro a exposición sobre a vida e a traxectoria de Juana de Vega, con motivo do 150 aniversario do seu falecemento, a cal permanecerá aberta ata o 24 de agosto.
A exposición “Juana de Vega, Condesa de Espoz e Mina (1805-1872): Facer no século” está organizada pola Fundación Juana de Vega con motivo do 150 aniversario do falecemento da ilustre coruñesa, que desenvolveu unha intensa actividade benéfica e social, unha muller progresista e liberal, avanzada para a súa época, que deixou un gran sinal non só na cidade da Coruña senón tamén en toda Galicia e resto do Estado.
Todos aqueles interesados en visitar a exposición desta importante figura da historia de Galicia e España, poderán facelo na Casa da Cultura Poeta Lois Pereiro, desde o 7 ao 24 de agosto, de luns a venres, en horario de 9.00 a 21.00h, e os sábados de 9.00 a 14.00h.
A mostra itinerante sobre a vida e a traxectoria de Juana de Vega abarca desde o seu nacemento en 1805 na Coruña ata o seu falecemento en 1872 nesta mesma cidade. A exposición iniciou o seu percorrido no principio do ano na cidade da Coruña, e posteriormente está a rotar polas principais cidades de Galicia, recalando ademais en Monforte de Lemos, terra da nai de Juana de Vega, e en Mondoñedo, de onde era orixinario o seu pai.
Cargando ...
