Foto Arquivo.
A sección sindical da CIG no hospital público de Monforte alerta sobre o que está a acontecer no centro de saúde de Chantada, que dende hai meses conta unicamente con tres facultativos traballando dos seis que integran o cadro de persoal. Mais a situación empeorou durante o verán, até o punto de que só están operativos dous médicos para atender cupos de máis de 8000 pacientes.
Dende a CIG-Saúde sinalan que a isto hai que sumarlle todos os pacientes desprazados que hai na localidade, o que fai que aínda se incremente máis a presión asistencial. “Esta situación tan caótica de tantos meses fixo que o Punto de Atención Continuada incrementase o número de pacientes atendidos por día se o comparamos co ano 2022 nas mesmas datas. Porque os pacientes non teñen médico por estar ausente e as listas de espera son longas, o que fai que acudan ao PAC”.
FALTA DE PEDIATRAS
Según CIG-Saúde, por se isto fose pouco, algún día no que houbo só dous médicos no centro de saúde en quenda de mañá, e un deles tivo que coller a baixa. Ao que hai que sumar que o Servizo de Atención Primaria de Chantada non conta con pediatría eses días.
Segundo indican, a solución adoptada pola Dirección de Atención Primaria da Área Sanitaria de Lugo, A Mariña e Monforte de Lemos foi deixar un médico do cadro de persoal e traer outro a maiores temporalmente. “Estes dous médicos de familia só van atender urxencias, e as axendas de todos os profesionais facultativos foron anuladas”.
Neste senso, lembran dende CIG-Sáude que estas datas coa celebración en Chantada da Romaría do Faro, fan que aínda haxa máis poboación no municipio. “En Carballedo a situación non é moito mellor, xa que dende xaneiro deste ano de dous médicos só hai un que atende aos dous cupos”.
ESPERAS DE 15 DÍAS PARA CITAS ORDINARIAS
Ao mesmo tempo, inciden en que no mes de maio o Sergas implantou en todos os centros de saúde do Distrito de Monforte, e en todos os centros de Galicia que non o tiñan, o programa XIDE, “que lonxe de axudar a xestionar a demanda das citas o que fixo foi empeorar a situación (o programa está mal deseñado e o que fai é aumentar as citas no día e inmediatas que dá o persoal non sanitario dos centros de saúde)”.
De xeito que o programa xera moitas urxencias innecesarias no día, desbordando os centros, e cousas que teñen que ser vistas no día teñan que agardar á primeira cita libre. En consecuencia, para evitar as listas de espera os pacientes acuden aos PAC do noso Distrito ou a Urxencias do hospital. “Só hai que ir aos Puntos de Atención Continuada da Zona Sur de Lugo e ao hospital de Monforte e ver salas ateigadas de xente”.
A situación dos centros de saúde do Distrito da Zona Sur de Lugo “é máis do mesmo porque non dan atendido os pacientes por estar a mínimos de persoal, mentres a Xerencia non cobre as ausencias”.
Como exemplo, sosteñen dende o sindicato que unha cita ordinaria no centro de saúde de Monforte pode ter unha lista de espera de 15 días.•
