O Espazo +60 Afundación de Monforte acolle a exposición fotográfica Out of wonderland de Carlos e Begoña Martínez Casanova, dous irmáns monfortinos. Trátase do seu primeiro proxecto, que foi presentado na Feira Andaluza de Arte Contemporánea – FADAC o pasado mes de abril. Alicia é só unha escusa para falar da perda dos soños camiño da idade adulta. Perda da capacidade de coarse en aberturas a outros mundos, con linguaxes aparentemente ilóxicas que nos achegan a certa esencia da realidade. Para esta exposición contan tamén coa pintora monfortina Anabel Álvarez Goyanes e a poesía da madrileña Elena González Reyes, xa que o proxecto foi concibido como colaborativo, que partindo dunha idea común, achéguenos os puntos de vista de diferentes artistas: mundos interiores, realidades, ausencia, dor, aceptación, transformación… Fotografías, instalacións, pintura, poesía. Cada artista mostra a expulsión do seu propio País das Marabillas.
Cargando ...
