O alcalde de Monforte, José Tomé Roca, e o presidente da Confederación Hidrográfica Miño-Sil (CHMS), José Antonio Quiroga, revelaron os primeiros avances na construción da agardada Estación Depuradora de Augas Residuais (EDAR) no Polígono. Estes pasos marcan o comezo dun proxecto clave para o tratamento e vertido axeitado das augas residuais da zona industrial.
O acordo de ocupación urxente dos terreos, aprobado polo Consello de Ministros en setembro, que pronto vai ser publicado no Boletín Oficial do Estado (BOE), é unha peza fundamental neste proceso. Este acordo permite avanzar no proxecto que supón un importante investimento de 4,6 millóns de euros. A construción da nova EDAR, financiada maiormente pola CHMS con 3,91 millóns de euros e unha contribución do Concello de Monforte de 690.000 euros, resolverá non só as necesidades actuais de depuración, senón tamén facilitará o crecemento da zona industrial.
«Estamos a dar pasos sólidos para facer realidade esta moderna EDAR, que marcará un antes e un despois na depuración de augas residuais na nosa cidade», sinalou o alcalde José Tomé Roca.
O acordo de cooperación entre o Concello de Monforte e a CHMS, asinado en marzo deste ano, establece un cronograma que estima a entrada en funcionamento da nova EDAR en 2026. A nova infraestrutura terá capacidade para tratar ata 1.000 metros cúbicos de auga ao día, satisfazendo as necesidades dun gran número de habitantes equivalentes e poñendo fin aos problemas actuais de depuración.
Este proxecto tamén abre as portas á ampliación do Polígono Industrial do Reboredo. «O noso traballo de promoción do polígono resultou nun éxito rotundo, coa venda de todas as parcelas dispoñibles», destacou o alcalde. «Hoxe temos dous expedientes de ampliación en marcha, que nos permitirán crear un polígono de máis de 815.000 metros cadrados, multiplicando a súa capacidade actual».
José Antonio Quiroga, presidente da CHMS, sinalou que o proceso de expropiación dos terreos afectados polas obras estará rematado en cinco meses, coa previsión de adxudicar as obras a principios de 2024. A expropiación afectará a terreos de 22 propietarios, que recuperarán os seus terreos nos mesmos termos que antes da ocupación temporal. A publicación da expropiación forzosa e temporal está prevista para outubro.
A nova EDAR no Polígono do Reboredo non só mellorará a capacidade de tratamento de augas residuais, senón que tamén resolverá os problemas ambientais relacionados co regato do Carballo, beneficiando a toda a comunidade.
SITUACIÓN ACTUAL
No presente, o Polígono de Reboredo encara importantes desafíos en relación coa súa Estación Depuradora de Augas Residuais (EDAR). A infraestrutura actual, que conta cunha autorización de vertido de 720 metros cúbicos diarios, presenta obstáculos que dificultan a instalación de novas industrias nun contexto de crecemento constante. Entre os problemas que afectan á EDAR actual atopamos a súa incapacidade para garantir un tratamento axeitado en termos de cargas e caudais xerados no polígono. Ademais, a localización do punto de vertido autorizado no regato do Carballo, debido ao seu caudal limitado, ten un impacto negativo no réxime hidrolóxico e na calidade das súas augas.
Unha EDAR Moderna para un Futuro Sostible
Diante desta problemática, propónse un ambicioso proxecto para a construción dunha nova Estación Depuradora de Augas Residuais que aborde eficazmente estes desafíos e permita o crecemento futuro do polígono industrial. O proxecto contempla a demolición da EDAR actual e a construción dunha nova nunha parcela de propiedade municipal contigua á súa localización actual.
A nova EDAR estará deseñada para tratar ata 1.000 metros cúbicos diarios, converténdoa nunha infraestrutura de gran capacidade capaz de atender a 8.342 habitantes equivalentes. Ademais, realizarase a construción dun emisario que se estenderá por máis de 1,5 quilómetros dende a nova EDAR ata o río Cabe.
Un aspecto fundamental deste proxecto é a súa planificación para o futuro. A EDAR proxectada solucionará os problemas actuais e tamén ten en conta a posibilidade de futuras ampliacións. Deseñouse con dúas liñas construídas e a posibilidade de engadir un terceiro reactor biolóxico e un terceiro decantador secundario nun espazo reservado na parcela onde se constrúe. As obras teñen un orzamento de 4,2 millóns de euros e un prazo de execución de 24 meses, incluíndo tres meses de explotación.
«A nova depuradora», sinalou o José Tomé Roca, «terá capacidade para depurar o actual polígono completo e tamén as ampliacións que temos en marcha, mesmo se duplicásemos o polígono existente actualmente».
Considera o Alcalde que este proxecto representa un paso adiante para asegurar un futuro sostible e próspero para a cidade de Monforte, consolidando o seu compromiso co desenvolvemento industrial e a protección do medio ambiente.•
Cargando ...
