Por Mateo L. Veiga
Logo dunha tempada pasada fantástica, acabando a fase regular en primeira posición, e ás portas do ascenso a LEB PRATA, o Ucoga C.B. Chantada comezaba o curso como un dos favoritos para asaltar a conferencia A.
O club moveuse notablemente no mercado, alternando renovacións de xogadores clave, como Carlos Noguerol ou Cristian Iglesias, e as incorporacións de promesas como Adrià Trouvé ou Jaime Fernández, procedentes do CB Valls e do UCB Córdoba, respectivamente. Ademais, grazas ao convenio formalizado co Ensino de Lugo, chegou talento da casa, como Pablo Marín. A peza para completar o quebracabezas foi asegurar a continuidade do capitán do barco, Alberto Fafián, que cumprirá a súa 17ª tempada como adestrador, e asinar con Alberto Gómez como segundo adestrador, moi querido entre a afección polo seu pasado como exxogador. Nunha fase regular repleta de equipos competitivos (Círculo Xixón Baloncesto, Cultural e Deportiva Leonesa, Marín Peixegalego, etc.), o Ucoga Chantada postulábase outro ano máis como un dos máximos favoritos para asaltar a fase final.
Pero arrincar non sempre resulta sinxelo. Dúas avultadas derrotas fronte á Cultural Leonesa e o CB Tormes, rivais directos, marcaron un inicio de tempada difícil, tanto a nivel de sensacións, como de vara de medir, sobre onde pode chegar este equipo. Con todo, os resultados mellorarían, grazas á vitoria por 59-84 ante o Bosco Salesianos, e o triunfo en casa este sábado ante o Obradoiro, un rival correúdo e cun estilo de xogo moi dinámico, onde milita Victory Onuetu (2,10m, 19 anos), un pivote cun poderío físico notable e un futuro brillante, tras formar parte este verán da Selección Española Sub-19, e proclamarse campión do Mundo.
Os últimos partidos evidencian unha melloría no xogo do Ucoga Chantada, cun Carlos Noguerol imperial.
O potencial deste equipo convida a crer outro ano máis, aínda que todo depende de como transcorra a adaptación dos reforzos.
O talento da mocidade está en bruto, en busca de desenvolver toda a súa valía, e non hai mellor lugar para progresar que en Chantada.
E para gañar partidos, todo é máis fácil con “Noguerator” ao temón.•
Cargando ...
