A Virxe de Montserrat trasladada á igrexa de San Vicente do Pino, aberta de novo ó culto

O Alcalde de Monforte, José Tomé Roca, e o Bispo de Lugo, Alfonso Carrasco Rouco, protagonizaron un día emotivo en Monforte, ao presidir os actos de traslado da imaxe da Virxe de Montserrat, patroa da cidade, e de reapertura da igrexa de San Vicente do Pino. Estiveron acompañados por unha ampla representación de autoridades e veciños de Monforte.
O traslado da imaxe da Virxe de Montserrat dende a igrexa da Régoa, onde se atopaba de forma provisional durante os traballos de mellora da igrexa de San Vicente, estaba previsto que se levara a cabo mediante unha procesión. Porén, as inclemencias climáticas fixeron que finalmente a imaxe fora desprazada en camión ata o templo de San Vicente.
José Tomé destacou a importancia deste día para Monforte: «Hoxe é un día importante para min como Alcalde e para Monforte, porque unha vez rematados hai uns días os traballos de mellora desta igrexa de San Vicente, que comezaron en 2019, este templo volverá a acoller celebracións litúrxicas e de culto, así como ser visitado por monfortinos, monfortinas e numerosos turistas ao longo do ano». “Dende o Concello”, subliñou o Alcalde, “levamos a cabo unha colaboración para facer posible o traslado da Virxe de Montserrat dende a igrexa da Régoa, e tamén cos gaiteiros que amenizaron dito traslado”.
Durante as reformas, financiadas grazas ó investimento de preto de 700.000 euros a cargo do Ministerio de Cultura, levaronse a cabo importantes actuacións nas pinturas murais do presbiterio, a nave central e muro norte do cruceiro, o retablo maior e o retablo en pedra do cruceiro do Mosteiro. Ademais, o proxecto descubriu unha pintura mural en bo estado de conservación, cun gran interese histórico e documental.
Según Tomé Roca, o Goberno de España demostrou o seu compromiso coa conservación do patrimonio da provincia e de Galicia, facendo que sexa máis atractivo a través da restauración de pezas e edificacións con gran valor histórico.•