A Deputación xerou un retorno económico de medio millón de euros no sector turístico co programa de visitas Coñece a túa provincia

Xa foron case 8.000 persoas dun total de 358 colectivos as que se beneficiaron destas viaxes gratuítas desde que a institución as puxo en marcha no ano 2021

A Deputación de Lugo está a celebrar o éxito da terceira edición do programa «Coñece a túa provincia,» unha iniciativa que ten como obxectivo fomentar o coñecemento dos recursos patrimoniais lucenses entre os veciños e veciñas da provincia. Desde o seu lanzamento en 2021, este programa xerou un retorno económico de preto de medio millón de euros no sector turístico.
Participaron na iniciativa un total de 358 colectivos e case 8.000 persoas, que tiveron a oportunidade de viaxar de forma gratuita polas distintas comarcas grazas ao programa. O Presidente da Deputación de Lugo, José Tomé Roca, sinalou que o programa é «un éxito» que contribúe a difundir o enorme patrimonio cultural e paisaxístico da provincia, xerando riqueza e dinamizando o turismo, a hostalería e o comercio. Tomé Roca engadiu que as experiencias son en xeral moi positivas, e a demanda é tan alta que tiveron que ampliar as prazas dispoñibles.

O Presidente da Deputación Provincial José Tomé Roca, destacou que «todos os anos queda xente en lista de espera» para participar nestas viaxes que ofrecen a oportunidade de explorar e descubrir os tesouros da provincia de Lugo.
Nesta terceira edición, membros da Asociación Aldea Nosa do Páramo pecharon as rutas cunha viaxe a Guntín e Palas de Rei, coñecendo bens patrimoniais da nosa provincia, como a igrexa do mosteiro de Ferreira de Pallares, a Ponte Cabalar, a igrexa de Vilar de Donas e o Castelo de Pambre.
Esta pasada semana, dúas asociacións de Lugo, a Federación Provincial de Amas de Casa, Consumidores e Usuarios Avantar e a Asociación Carpe Diem, participaron no programa e escolleron A Mariña como destino para coñecer, visitando lugares como o faro de Punta Roncadoira, o Souto da Retorta, o casco histórico de Viveiro, a fervenza do Pozo da Onza, o Castelo de Castrodouro e a Finca Galea, onde os participantes puideron gozar dunha experiencia enriquecedora e coñecer a diversidade da provincia.
Na presente edición de 2023, preto de 3.000 persoas pertencentes a 142 colectivos tomaron parte no programa. A Deputación ofrece 37 itinerarios por toda a xeografía lucense, aínda que A Mariña lucense e a Ribeira Sacra foron novamente os destinos máis solicitados.

RUTAS POLA RIBEIRA SACRA LUCENSE
Ata dez son os roteiros dispoñibles na Ribeira Sacra lucense:
RUTA 9 (MONFORTE): visita ao conxunto histórico de San Vicente do Pino e torre da homenaxe, ao Colexio do Cardeal e visita ao Centro do Viño.
RUTA 10 (SOBER): visita a unha adega en Amandi, á Rectoral de Gundivós, con demostración de olaría tradicional, e visita a un miradoiro sobre o Canón do Sil.
RUTA 11 (SOBER, MONFORTE): visita a unha igrexa románica en Sober e a un miradoiro. Percorrido en catamarán polo Canón do Sil.
RUTA 12 (O SAVIÑAO): visita ao Ecomuseo de Arxeriz, miradoiro do Cabo do Mundo II en San Lourenzo de Fión e percorrido en catamarán polo Miño dende Belesar pobo.
RUTA 13 (TABOADA, CHANTADA): visita á igrexa de San Pedro de Bembibre ou á igrexa de Taboada dos Freires, visita ao casco histórico de Chantada, visita á igrexa de Nogueira de Miño (Chantada) ou San Salvador de Asma e a unha adega.
RUTA 14 (PANTÓN, CARBALLEDO): visita a unha adega, ao pobo dos Peares, visita ao convento do Divino Salvador de Ferreira de Pantón e á igrexa de San Miguel de Eiré.
RUTA 15 (PARADELA, PORTOMARÍN): visita á igrexa de San Facundo de Ribas de Miño e ao miradoiro de Cabodevila. Visita á vila de Portomarín e ao castro de Castromaior.
RUTA 16 (BÓVEDA, A POBRA DO BROLLÓN): visita á aula forestal Os Trollos (Bóveda), visita ás adegas de Vilachá e ao miradoiro da Capela. Visita ao castro de San Lourenzo (A Pobra do Brollón).
RUTA 17 (RIBAS DE SIL, QUIROGA): visita ao Xeomiradoiro de Louxoá e á igrexa de Torbeo (Ribas de Sil), ao museo Xeolóxico de Quiroga e ao túnel romano de Montefurado.
RUTA 18 (QUIROGA): visita ao Museo Etnográfico de Quiroga e Xeomiradoiro de Campodola, a unha adega e ao Castelo de Torrenovaes.•

Deixa unha resposta

Your email address will not be published.

Nova Anterior

Circuito de teatro afeccionado 2023

Seguinte Nova

Todos en contra da violencia de xénero

Últimas noticias sobre PORTADA

A %d blogueros les gusta esto: