O Ministerio de Transportes, Mobilidade e Axenda Urbana (Mitma) asinou un acordo coa Deputación de Lugo e o Concello de Monforte de Lemos para desbloquear un novo proxecto viario crucial. Co orzamento estimado de 7,5 millóns de euros (IVA incluído), o proxecto mellorará significativamente a conexión entre as estradas N-120A e N-120, ao mesmo tempo que reforzará a seguridade viaria na área. Este compromiso tripartito implica unha distribución de financiamento na que o Mitma aportará o 90%, a Deputación de Lugo o 6,66%, e o Concello de Monforte de Lemos o 3,34%.
O acordo, asinado nun contexto de colaboración entre as administracións, ten obxectivos claros. En primeiro lugar, establece o marco para a redacción do anteproxecto, proxecto de trazado e de construción, tramitación ambiental, así como asistencia técnica para a execución do proxecto e a correspondente tramitación das expropiacións necesarias. Ademais, contempla a cesión do tramo de estrada construído polo Ministerio ao Concello de Monforte de Lemos.
O Ministerio comprométese a liderar varias fases do proxecto, incluíndo a redacción e aprobación do anteproxecto e proxecto de trazado e construción do novo viario. Tamén será responsábel pola tramitación do procedemento de avaliación ambiental do anteproxecto, a tramitación do expediente expropiatorio correspondente, e a licitación e execución das obras, xunto coa contratación de todas as asistencias técnicas necesarias.
A Deputación de Lugo, pola súa parte, asume a obrigación de financiar parte das actuacións recollidas no acordo. Ao mesmo tempo, o Concello de Monforte de Lemos non só contribuirá financeiramente, senón que tamén aceptará a cesión do tramo de estrada construído polo Mitma unha vez finalicen as obras.
O convenio estará vixente ata a recepción e liquidación das obras e, como máximo, por un prazo de 4 anos desde a data en que sexa eficaz, unha vez inscrito no Rexistro Electrónico estatal de Órganos e Instrumentos de Cooperación do sector público estatal. Así mesmo, será publicado no Boletín Oficial do Estado. A vixencia do convenio poderá prorrogarse por un período de ata catro anos adicionais, mediante a tramitación da addenda correspondente, previo cumprimento de todos os trámites e requisitos que resulten preceptivos de conformidade coa lexislación vixente.
VALORACIÓNS DO
ALCALDE DE MONFORTE
O Alcalde de Monforte, José Tomé Roca salientou que “é unha gran noticia sen dúbida para o noso Concello, unha gran noticia para Monforte, e eu diría que é unha noticia histórica porque, por fin despois de 30 anos vai ser realidade a medio prazo a construción do tramo da Ronda Urbana entre a rotonda da rúa Ourense e a N-120, completando así a Ronda Urbana entre o cruce da rúa San Pedro, a rotonda do Hórreo e a recta de Distriz, quedando completa a circunvalación de Monforte”. “Polo tanto”, subliñou o Alcalde, “é unha inversión moi importante, como se pode observar. Nun tramo moi pequeno de 1,2 km., pero que a parte da compra dos terreos e de a realización das obras, hai que facer unha ponte sobre o río Cabe, tamén sobre a estrada de Sober, e sobre a vía do ferrocarril, ademais de facer o entronque coa N-120”.
Rematou Tomé Roca, destacando que “esta é unha obra máis das que marcan un antes e un despois no noso Concello, dende que eu cheguei á alcaldía no ano 2015. E o meu compromiso cos monfortinos e coas monfortinas é seguir traballando para que Monforte siga medrando, como o está facendo” resaltou o rexedor monfortino, quen tamén anunciou que “dentro de pouco, daremos información e novas de novos investimentos que van seguir mellorando a vida de todos os veciños e de todas as veciñas de Monforte”.•
Cargando ...
