O Alcalde de Monforte de Lemos, José Tomé Roca, vén de presentar a pasada semana os Orzamentos Municipais para o ano 2024, que ascenden a máis de 16 millóns de euros (16.386.335,94€). Este orzamento reflicte un incremento significativo con respecto ao ano 2023, superando en máis dun millón de euros (1.015.189,71€), o que representa un aumento do 6,60%. En 2023, o orzamento municipal foi de 15.371.146,23€.
O rexedor monfortino destacou que os Orzamentos Municipais para o 2024 teñen como principais piares os servizos sociais e as inversións. José Tomé subliñou que este enfoque reflicte a prioridade do Equipo de Goberno na mellora da calidade de vida dos cidadáns e no desenvolvemento da cidade e das parroquias.
No ámbito das inversións, o Executivo de José Tomé asignou para o ano 2024 un total de 1.014.079,70€, un aumento considerable en comparación cos 625.099,18€ consignados en 2023. Este incremento, de 62,22%, representa un dos maiores na historia do Concello de Monforte con fondos propios, sinalou o Alcalde. O Alcalde destacou as melloras de vías urbanas, no Polígono do Reboredo, e na construción dunha nova conexión entre as estradas N-120A e N-120.
José Tomé destacou que os Orzamentos para o 2024 reflicten un compromiso social sólido, coas áreas de servizos sociais e inversións como prioridades. O Alcalde subliñou o esforzo do Concello por reducir o gasto corrente non prioritario, sen aumentar impostos, e xestionar eficazmente os recursos para atender ás necesidades da comunidade.
Os ingresos previstos para o ano 2024 ascenden a 16.386.335,94 euros. Destes, 4.420.000€ provirán da participación nos Tributos do Estado, experimentando un incremento de 2,42% en relación ao ano anterior. Os Fondos de Cooperación cos Concellos da Xunta de Galicia aumentarán en 31.398,20€, pero o Alcalde expresou preocupación pola falta de axuda substancial por parte do Goberno galego.
No desglose por capítulos, no Capítulo 1, correspondente a gastos de persoal, hai un aumento do 4,63%, alcanzando un total de 5.202.085,35€. O incremento está relacionado co compromiso de aplicar a Relación de Postos de Traballo (RPT), coa aplicación dun 33% en 2024.
No Capítulo 2, de gasto corrente, o Alcalde destacou un aumento do 3,19%, chegando a 8.898.094,31€. A pesar do incremento de custos, o rexedor subliñou unha xestión rigorosa, reducindo a suba porcentual do gasto corrente nun 1,55% en comparación co ano anterior.
O Capítulo 4, relativo a subvencións e transferencias, conta cunha partida total de 1.185.076,58€, aumentando en 4,61% con respecto a 2023. Este incremento reflicte o compromiso co apoio a deportes, festas das parroquias, entre outras actividades.
No ámbito de servizos sociais, os Orzamentos para o 2024 destinan 1.894.033,64€ á Axuda no Fogar (SAF), cun incremento do 9,79% en comparación con 2023. O SAF inclúe tamén partidas para emerxencias sociais e eficiencia enerxética.
“En definitiva”, concluíu o Alcalde, “quero insistir en que os 2 piares que son a base fundamental destes orzamentos, son os servizos sociais e as inversións, o que demostra que a bandeira deste Equipo de Goberno é a preocupación social, e que todo xira arredor das persoas, e tamén na mellora da cidade e das parroquias”. “Con estes datos, queda claro que estes orzamentos son os máis sociais da historia do Concello de Monforte, o que demostra que temos unha preocupación máis social, que queda explicitada nestes orzamentos, que é onde hai que demostralo aportando recursos”. “Como vén, estes orzamentos vannos permitir seguir mellorando a nosa cidade, tal y como vimos facendo ano tras ano, polo que os orzamentos están pensados unicamente por e para os monfortinos e as monfortinas, é dicir, están pensados en Monforte de Lemos”.
Neste senso, os orzamentos para o 2024 manteñen as liñas xerais de anos anteriores, “porque Monforte evoluciona ben, porque Monforte vai ben, nos que procuramos reducir o máximo o gasto corrente non prioritario para atender ás áreas de gasto que para nós son prioritarias, e sen incrementar os impostos, xestionando ben os recursos propios e conseguindo financiación doutras administracións”. As prioridades dos orzamentos son a atención as persoas, a mellora da cidade, o deporte, a cultura e o medio ambiente. “Como se pode ver, son uns bos presupostos para Monforte e por todo isto, esperamos que o resto dos grupos municipais tamén apoien co seu voto este orzamento que levaremos ó Pleno do vindeiro luns 27 de novembro, uns orzamentos que, reitero, son bos para Monforte, e non hai razóns obxectivas para non apoialos, salvo si se practica a política do non polo non, que serán aprobados en todo caso, pola ampla maioría absoluta que elixiron os veciños e veciñas de Monforte”, concluíu José Tomé.•
Cargando ...
