A Rede Museística Provincial de Lugo, vinculada á área de Cultura da Deputación de Lugo, presenta «Un ronsel de futuro», unha webserie documental que mergulla a audiencia na riqueza e diversidade dos catro museos que conforman a rede. O obxectivo principal deste proxecto é transmitir os contidos tanto materiais como emocionais dos museos, narrando unha historia de ficción que tamén serve para documentar a historia e o patrimonio local.
A trama segue a Braulio, que, despois de cumprir unha condena por grafitar dinosauros no patrimonio, acepta participar nesta iniciativa como parte do seu proceso de reinserción. Bajo a guía do seu titor, Alexandre, Braulio descobre a importancia de crear unha webserie documental sobre a Rede Museística Provincial de Lugo.
O proxecto, liderado por O Señor López (Brian Rodríguez e Rubén Pérez), conta coa colaboración da xerente Encarna Lago, artistas como Mónica Alonso, e destacadas figuras locais como Pilar Yáñez e Mónica Álvarez. A participación de colectivos como o Club Sénior do Museo do Mar, o Grupo de Teatro Antas de Ulla, Espazo Lupa e o Colexio Público de Antas enriquece a produción.
A webserie percorreu diferentes localizacións da provincia de Lugo, incluíndo O Cebreiro, Foz e Samos, así como os propios museos: o Pazo de Tor, o Museo-Fortaleza San Paio de Narla, o Museo Provincial de Lugo e o Museo do Mar.
Despois de presentarse nos Cines Númax e en Bos Aires, da man da Universidade Nacional Tres de Febrero, a webserie documéntase con formato de espectáculo en diferentes comarcas. O pasado domingo, presentouse na Casa da Cultura de Antas de Ulla. O 26 de novembro pasarase na Casa Museo Manuel María en Outeiro de Rei ás 12:30 h. Máis tarde, chegará a Barreiros, O Courel, Sarria, Meira, Lugo,… •
Cargando ...
