O alcalde de Sober, Luis Fernández Guitián, e a concelleira Raquel Arias, reuníronse con membros da ANPA do CEIP Plurilingüe Virxe do Carme para facer balance dos investimentos realizados no centro e presentar as obras previstas para este novo ano. Contando co apoio da Xunta de Galicia entre 2009 e 2022, o CEIP Virxe do Carme recibiu máis de 530.000 euros en investimentos. Estes fondos permitiron realizar melloras significativas, como a renovación do sistema de calefacción, arranxo da instalación eléctrica, acceso e reformas nas instalacións, obras no polideportivo, creación dun parque infantil, ampliación do comedor e almacén, reforma do salón de actos e medidas para mellorar a eficiencia enerxética, entre outras.
No presente ano, o proxecto inclúe obras de mellora e acondicionamento, destacando a reforma da cuberta do ximnasio e a substitución das baixantes e canalóns do edificio.
O CEIP participa en diversos proxectos, en colaboración co Goberno local, como o PLAMBE (Plan de Mellora de Bibliotecas Escolares), radio na biblioteca, biblioteca creativa, club de lectura e programa de voluntariado. Ademais, o colexio experimentou un notable crecemento no número de alumnos nos últimos anos, case duplicándose de 39 en 2010 a case 70 no curso actual. O investimento sostido destaca o compromiso coa educación e o benestar dos estudantes nun futuro prometedor.•
