O proxecto formativo «Galegas Dixitais», financiado pola Unión Europea NextGenerationEU a través do Plan de Recuperación, Transformación e Resiliencia, ten como obxectivo principal mellorar as capacidades dixitais de mulleres residentes en zonas rurais, especialmente aquelas que se atopan en situación de desemprego. Ademais de potenciar as súas habilidades tecnolóxicas, o programa busca incrementar o seu nivel de empregabilidade, fomentar o emprendemento e contribuír ao desenvolvemento rural, todo iso co obxectivo de reducir a fenda de xénero no ámbito dixital.
INSCRICIÓN NA OFICINA DE SERVIZOS SOCIAIS
O Concello de Chantada será un dos lugares onde se desenvolverá esta formación, que terá unha duración total de 120 horas e dará comezo o 29 de xaneiro na aula de informática do telecentro local. As mulleres interesadas en participar poden realizar a súa inscrición na oficina de servizos sociais do Concello.
FORMACIÓN GRATUITA
A formación, completamente gratuíta, será impartida por expertos docentes que guiarán ás participantes a través dun itinerario formativo progresivo. Este itinerario abranguerá dende un nivel básico de competencias dixitais ata un nivel avanzado, proporcionando coñecementos en novas tecnoloxías e ampliando así as oportunidades de empregabilidade e emprendemento.
COMPETENCIAS DIXITAIS
Entre os contidos do programa destacan aspectos fundamentais como navegación, configuración e uso de navegadores, procura de información en internet, nocións básicas de seguridade informática, creación e edición de contidos dixitais, técnicas avanzadas de procura de información, almacenamento en nube, uso básico de redes sociais, e adquisición de bens e servizos a través de plataformas de comercio electrónico, entre outros temas.
TÍTULO ACREDITATIVO E ORDENADOR PORTÁTIL
Ao rematar o programa, cada participante recibirá un título oficial acreditativo da formación completada e tamén se lles entregará un ordenador portátil, co obxectivo de fomentar o acceso e a participación dixital nas comunidades rurais.•
Cargando ...
