Foto ARQUIVO.
A Xunta de Galicia anunciou este mércores a adxudicación dunha parcela de 17.782 metros cadrados no Porto Seco de Monforte de Lemos, propiedade do Instituto Galego da Vivenda e Solo (IGVS). A operación realizouse por un importe de 462.332 euros, aplicando unha bonificación do 50% sobre o prezo inicial, seguindo a porcentaxe vixente en todos os parques empresariais do Goberno galego na provincia de Lugo.
A empresa adxudicataria planea destinar estes terreos á construción dunha fábrica de granulados, utilizados en caldeiras de calefacción. O proxecto implica o uso anual de aproximadamente 70.000 toneladas de madeira e serradura de piñeiro para a súa fabricación. A superficie construída abranguerá máis de 3.600 metros cadrados, incluíndo edificacións, mentres que o resto da parcela será destinado a instalacións adicionais, como silos e equipos complementarios. O investimento total previsto pola empresa ascende a preto de 14 millóns de euros, que inclúen o custo de adquisición do terreo. Estímase que o proxecto xerará 20 postos de traballo directos e 27 indirectos, especialmente en áreas de loxística e extracción de materia prima.
A resolución da adxudicación establece un prazo máximo de tres meses para formalizar a venda da parcela a través dunha escritura pública. Este paso é unha peza clave no avance do proxecto, que non só representa un impulso económico para Monforte de Lemos, senón tamén a creación de emprego e oportunidades na rexión.
O Porto Seco de Monforte, que leva moitísimos anos bloqueado e sen avances significativos, comeza a recibir investimentos e proxectos empresariais que promoven o desenvolvemento económico e industrial da zona.
O certo é que queda xa moi afastado no tempo, aquelas proclamas que aseguraban un futuro prometedor para a que estaba chamada a ser a principal plataforma loxística de Galicia. Na hemeroteca dos primeiros números de EnComún, pódense atopar artigos respecto diso, e convén sinalar que este 2024 cumprimos 20 anos. É dicir, que tiveron que pasar vinte anos, que para Gardel non son nada, para que, salvando o breve período en que foi utilizado por Transfersa en 2008 para a loxística de vehículos, a que aparecese un investidor interesado en instalarse nestas instalacións, de xeito evidente deixadas da man de deus, entre acusacións cruzadas entre políticos de todo ámbito e ideoloxía. Unha boa noticia, a que a Xunta comunica, unha casualidade que sexa un día despois de que Gómez Besteiro, visita estas instalación (páxina 5 deste xornal). Oxalá sexa de verdade o comezo dun proxecto que leva moitos anos durmido.•
Cargando ...
