O vicepresidente da Deputación de Lugo e deputado de Deportes, Efrén Castro, participou na presentación do percorrido da terceira edición de “O Gran Camiño”, a volta ciclista profesional que, polo terceiro ano consecutivo, trae á provincia de Lugo os mellores equipos e ciclistas internacionais, co patrocinio da área de Deportes.
O acto, celebrado no Auditorio Fontán en Compostela, desvelou o percorrido completo da etapa lucense, a segunda da volta, que se disputará o 23 de febreiro e que atravesará oito concellos. Taboada -saída da etapa-, Monterroso, Palas de Rei, Guntín, Portomarín, Paradela, O Saviñao e Chantada -chegada – completan o itinerario lucense da proba, que concede especial protagonismo ás ribeiras do Miño.
Efrén Castro destacou que “desde a primeira edición, O Gran Camiño situou as comarcas de Lugo como escenario do mellor ciclismo internacional, o que supón unha plataforma inmellorable para a proxección do territorio ao chegar a pantallas de todo o mundo”. Valorou tamén “que nesta terceira edición, o itinerario teña como referencia o Miño, un dos elementos xeográficos máis emblemáticos de Galiza, e contribúa ao recoñecemento da viticultura da Ribeira Sacra, fundamental para o mantemento das paisaxes e do dinamismo económico, social e cultural das comarcas do sur de Lugo”.
Con este evento, Lugo consolida a súa posición como epicentro do ciclismo internacional, destacando a beleza natural das ribeiras do Miño e promovendo a Ribeira Sacra como unha peza clave do patrimonio galego. A Deputación de Lugo, a través da área de Deportes, continúa comprometida coa promoción do territorio a través do deporte de elite.•
Cargando ...
