O candidato socialista á Presidencia da Xunta de Galicia, José Ramón Gómez Besteiro, reuniuse en Monforte con máis de 500 persoas para compartir as súas propostas de desenvolvemento económico e social para a comarca. Destacou a necesidade de desbloquear o Porto Seco de Monforte, paralizado polo PP durante máis de dez anos, para convertelo nun nodo loxístico de referencia en Galicia e Europa. Besteiro asegurou que esta actuación será fundamental para a creación de emprego e o desenvolvemento industrial e empresarial da zona. “Esta actuación, que o PP mantén paralizada desde hai máis de dez anos, é clave para a creación de emprego, o desenvolvemento industrial, empresarial e innovador de Monforte e toda a súa comarca”. Ademais, propuxo o desdobramento integral do Corredor Nadela-Sarria-Monforte para convertelo nunha autovía, asegurando así unha conexión estratéxica co interior de Galicia. Criticou a xestión do PP, que en 15 anos apenas avanzou 11 quilómetros nesta vía esencial para o desenvolvemento da comarca.
Besteiro ofrecéu diálogo para desatascar as actuacións iniciadas polo Goberno de España para mellorar as infraestruturas na zona, como a electrificación da conexión ferroviaria coa Meseta en Alta Velocidade e a finalización da Ronda urbana de Monforte. Estas obras farán prosperar, dixo, a labor do alcalde José Tomé, coa implantación na cidade de proxectos punteiros como o da farmacéutica Kern Pharma ou o Centro de Ciberseguridade de Renfe. Recolleu tamén a petición do Concello para dobrar a superficie do Polígono Industrial porque “a Xunta que eu presida deixará de ser un obstáculo para converterse en aliada dos concellos, de forma activa e dinamizadora, atraendo novos investimentos e eliminando a burocracia e a mala xestión”. “Queremos unha Galicia viva, que medre ao mesmo ritmo que o resto de España, que cree emprego e permita á xente quedarse a vivir nos seus pobos e cidades se así o queren, pero para iso debemos tamén recuperar a calidade dos servizos públicos que nos foron recortados por estes 15 anos de ineptitude do PP”.
Neste sentido, Besteiro cualificou como a situación máis grave a que atravesa a Sanidade Pública en Galicia e asegurou que, “para os socialistas é fundamental reforzar a Atención Primaria, dotándoa de máis profesionais e especialidades” e, no caso de Monforte, “dotar de máis investimentos e máis persoal ao Hospital Comarcal”. Acusou a Rueda de ir desmantelando ás caladas a Sanidade e así, constatou que “o Centro de Saúde monfortino ten 5 médicos dos 12 que precisaría para atender a unha poboación de máis de 18.000 habitantes. Nos garantimos a cita médica en 48 horas. Coa saúde non se xoga”.
Por último, Besteiro apuntou á potenciación do sector vitivinícola e comprometeuse a loitar pola declaración da Ribeira Sacra como Patrimonio da Humanidade pola UNESCO.•
Cargando ...
