O equipo de goberno de Quiroga fixa as prioridades para o novo Orzamento

O Equipo de Goberno de Quiroga, liderado polo Alcalde José Luis Rivera, está a traballar no Orzamento 2024. Foto RTMQ.

O Equipo de Goberno de Quiroga está a traballar arreo na elaboración do novo orzamento municipal, que será presentado na próxima sesión plenaria para a súa aprobación. Este presuposto, que se describe como «diferenciador», busca dotar a cada área dos recursos económicos necesarios para satisfacer as demandas da veciñanza e cubrir os servizos básicos de forma eficiente.
Estes serán os primeiros presupostos elaborados por este goberno, que ata o momento estivo traballando cun orzamento «escaso e adaptado ao anterior mandato». Con este novo enfoque, a intención é atender a todas as necesidades da comunidade, escoitando suxestións, demandas e críticas.
Entre as prioridades do novo orzamento, destacan iniciativas para o benestar social, actividades para maiores e nenos, o fomento do deporte, a atención ás aldeas e a mellora das infraestruturas municipais, incluído o Albergue Municipal, así como a atención ás demandas de obras.
Un dos desafíos herdados e prioritarios para este goberno é o servizo municipal de auga, que se vén enfrontando a problemas significativos. O gran incendio do verán do 2022 e os movementos de terra subsiguientes afectaron gravemente á calidade da auga, provocando cortes no subministro. O grupo de goberno é consciente deste desafío e, a pesar das críticas, está a traballar para abordar a situación, con plans para construír un novo depósito de almacenamento e mellorar a rede de distribución. Ademais, o Concello asegurou financiamento para a compra dun tractor con desbrozadora para atender as necesidades das aldeas e parroquias. Tamén dispoñen de fondos para obras, turismo, servizos sociais e educación, a través do Plan Único da Deputación Provincial de Lugo.
Outras accións planificadas inclúen iniciativas para fomentar o emprendemento e apoiar a creación de novas empresas, así como a reactivación das instalacións do Centro Social, a promoción do deporte e eventos deportivos locais, e o fortalecemento do patrimonio cultural e turístico da zona.•

Deixa unha resposta

Your email address will not be published.

Nova Anterior

O teu corazón pide Sarria

Seguinte Nova

A XV Olimpiada de Xeoloxía celebra a súa fase galega nas Montañas do Courel

Últimas noticias sobre POLÍTICA LOCAL

A %d blogueros les gusta esto: