Foto ARQUIVO.
Dende esta semana os traballadores autónomos en Galicia terán a oportunidade de solicitar axudas para contratar persoal de forma indefinida, así como para a súa formación. Este programa, publicado polo DOGA o pasado 29 de xaneiro pola Consellería de Promoción do Emprego e Igualdade, conta cun orzamento de 1,3 millóns de euros, co obxectivo de facilitar a contratación de aproximadamente 140 persoas desempregadas. Estas axudas, que estarán dispoñibles ata o vindeiro 30 de setembro, pretenden fomentar a creación de empregos estables e contribuír ao crecemento económico da comunidade. Especial atención se dá aos colectivos con máis dificultades de acceso ao mercado laboral.
AXUDAS ENTRE 7.500 E 17.600 EUROS POR TRABALLADOR INDEFINIDO
O incentivo para a contratación do primeiro traballador indefinido oscila entre os 7.500 e os 14.400 euros, mentres que para o segundo e terceiro empregado, a axuda vai desde os 9.000 aos 17.600 euros. Ademais, priorízanse e incentivánselle con maiores apoios ás persoas desempregadas de longa duración, maiores de 52 anos, con discapacidade, en risco de exclusión social, emigrantes retornadas e estranxeiras, así como tamén ás mulleres, colectivo que se suma este ano como grupo prioritario. Estas cantidades base poderán aumentar nun 15%, acumulables entre si, se a persoa contratada é muller nunha profesión subrepresentada, no caso de establecementos situados en zonas rurais, para maiores de 45 anos e persoas trans. Dende o Goberno galego declaran «reafirmar así o seu compromiso coa promoción do emprego autónomo e o desenvolvemento dos principais sectores económicos, mediante múltiples medidas de apoio, consolidación e mellora ao longo da vida profesional destes traballadores». •
Cargando ...
