O Alcalde de Monforte, José Tomé Roca, recibiu no seu despacho da Casa do Concello ó novo Inspector Xefe da Policía Nacional en Monforte, Pablo Fernández López, acompañado polo Comisario provincial de Lugo, Luis Miguel Romera Pérez. Fernández López asumiu o seu cargo hai uns días, sucedendo a Tomás García, que dirixiu a comisaría desde agosto de 2023.
Durante a reunión, o Alcalde e o novo Inspector Xefe abordaron o estado actual da seguridade na cidade, destacando a baixa incidencia delituosa, pero reafirmando a necesidade de manter a colaboración entre os diferentes corpos de seguridade do Estado. Tomé Roca subliñou a importancia de traballar en conxunto para seguir garantindo un ambiente seguro para os veciños de Monforte.
Tamén se discutiu sobre o futuro edificio que albergará a Comisaría da Policía Nacional en Monforte, cuxa licitación foi anunciada polo Alcalde o pasado mes de decembro de 2023, cun orzamento de preto de 4,7 millóns de euros.
O novo Inspector Xefe, nacido en Ferrol en 1972, é diplomado en graduado social e licenciado en Ciencias Policiais, e conta con ampla experiencia na Policía Nacional. Destacou como xefe do MIP en Telde, nas Palmas de Gran Canaria, e como xefe da Brigada Provincial de Seguridade Cidadá de Lugo dende o 2019. Fernández López foi recoñecido con múltiples distincións pola súa dedicación e mérito no servizo policial.
José Tomé Roca expresou tamén o seu recoñecemento e agradecemento ó traballo desempeñado polo anterior Inspector García, e deu á benvida ao novo líder da Policía Nacional en Monforte, reafirmando o compromiso coa seguridade e o benestar dos cidadáns da cidade.
RECEPCIÓN NA SUBDELEGACIÓN DO GOBERNO
Previamente, a subdelegada do Goberno en Lugo, Isabel Rodríguez, tamén recibiu ao novo xefe da comisaria de Monforte, o inspector xefe, Pablo Fernández, nunha reunión, na que tamén estivo presente o comisario provincial, Luis Romera, coincidindo coa subdelegada sobre o importante labor cidadán que vai facer o novo cargo á fronte da comisaría, e agardando manter esa guía de traballo establecida polos responsables anteriores. Isabel Rodríguez felicitouno polo seu novo cargo, co que vai a coñecer e traballar con profesionais da vila e arredores da provincia e confía en que desempeñará as súas tarefas con responsabilidade e dilixencia a través da integración e dedicación do corpo cos habitantes do municipio e velando pola súa seguridade e protección.
Así mesmo, Rodríguez mandoulle unha mensaxe de apoio e tendeulle a man da propia Subdelegación e dela mesma “para garantir a convivencia e o achegamento do corpo aos habitantes da provincia, logrando unha seguridade efectiva e real”. •
