Ata o 31 de marzo de 2024 ás doce da noite está aberto o prazo para enviar traballos ao IX Concurso Fotográfico Red Ribeira Sacra-Viticultura Heroica, que organiza Mar López Sotelo, divulgadora cultural e administradora do grupo de Facebook Red Ribeira Sacra y Camino de Santiago, en colaboración co Concello de Pantón e o Consello Regulador da D.O. Ribeira Sacra. A convocatoria ampliou o prazo de recepción de obras para non coincidir coas datas de Entroido e das eleccións autonómicas, e pola alta demanda de participación.
COMO PARTICIPAR
As bases do concurso indican que os traballos deberán reflectir a viticultura heroica ou de alta montaña nos seus diversos traballos, paisaxes, territorios, adegas e as diferentes variedades propias da Denominación de Orixe Ribeira Sacra. Para a puntuación, nos traballos se valorará a composición, a creatividade e a calidade técnica. O concurso está aberto tanto a fotógrafos profesionais ou afeccionados maiores de idade, ou menores con autorización.
Cada participación poderá presentar ata dúas fotografías en color ou branco e negro, realizadas con cámara fotográfica, dron ou teléfono móbil, puidendo optar unicamente a un só premio. As fotografías presentaranse en formato jpg cunha resolución mínima de 1024 x 1024 píxeis, cun peso non superior a 4 Mb.
As imaxes enviaranse a través do enderezo electrónico redribeirasacra@gmail.com, antes das 23:59 horas do 31 de marzo de 2024. A mensaxe estará encabezada co asunto “IX Concurso Fotográfico Red Ribeira Sacra-Viticultura Heroica”, e se deberá indicar o título da fotografía, acompañado dos datos de identificación e contacto da persona autora do traballo. Dende a organización recomendan enviar unha única fotografía en cada correo, para evitar sobrecargas na rede. Así mesmo, indicarase cun número a orde en que se envían as fotografías.
CATRO PREMIOS
Os traballos enviados serán de uso exclusivo para o concurso, non puidendo ser premiadas con anterioridade. As fotografías recibidas serán publicadas no grupo de Facebook Red Ribeira Sacra y Camino de Santiago por parte da administradora, co fin de valorar o número de interaccións. Esta ponderación unirase á valoración realizada polo xurado, que estará formado por profesionais afíns ao mundo da fotografía, a viticultura e as artes plásticas da Ribeira Sacra. Todos os traballos presentados formarán parte da exposición itinerante “IX Concurso Fotográfico Red Ribeira Sacra-Viticultura Heroica”.
As bases establecen catro premios: un lote de viños da Denominación de Orixe Ribeira Sacra, por xentileza do Consello Regulador da D.O. Ribeira Sacra; unha cata nocturna para dúas persoas, por xentileza da adega EDV subzona Quiroga-Bibei; unha viaxe en zodiac polo Miño para dúas persoas, por xentileza de Turismo Pantón, con visita á Fervenza de Augacaída, cata e degustación de produtos da zona.
Os premios entregaranse nun acto público no marco da celebración da Mostra dos Viños de Pantón 2024. •
