O tradicional Encontro Palilleiro de Sarria, unha celebración arraigada na cultura e nas tradicións da vila, volverá a encher de vida o 16 de marzo, despois de catro anos de ausencia. A iniciativa, liderada pola Asociación de Palilleiras Camiño de Santiago de Sarria, conta co apoio da Vicepresidencia da Deputación de Lugo, o que representa un impulso significativo para o evento. Efrén Castro, vicepresidente e deputado de artesanía e deseño, tivo un papel destacado na volta deste encontro, entregando material ás usuarias da asociación para distribuír entre os asistentes. Agárdase que a xornada conte con aproximadamente 300 persoas. Ademais do material proporcionado pola Deputación, as palilleiras tamén recibirán exemplares dos libros «Samos» e «Ourivería antiga do Museo Provincial de Lugo», editados polo servizo de Publicacións da institución provincial. Ademais, recoñecerase o traballo doutras entidades participantes, como o de Pablo Mazoy, Rosa Jove e Nacho Porto, a través da exposición das súas artesanías.
«Citas coma esta permiten conservar o noso patrimonio artístico e material e dar a coñecer un traballo que, sobre todo, avoas e nais conservan grazas aos seus antepasados. Con esta xuntanza podemos achegarnos a novas xeracións, algo esencial para que sobrevivan oficios e traballos coma este», explicou Efrén Castro.
Dende a agrupación sarriá móstranse entusiasmados ante esta novena edición do Encontro Palilleiro de Sarria. Despois dun período de interrupción e dun cambio na directiva, esperan atraer a un amplo público e encher o pavillón do Chanto con mulleres e homes de todas as idades, co único obxectivo de preservar este arte tan característico da nosa cultura.•
Cargando ...
