A Feira do Viño de Chantada foi un auténtico éxito, moita animación, caras coñecidas, boa organización e bos viños. Pouco máis se pode pedir. Foto GPCCH.
O Concello de Chantada desfrutou o pasado fin de semana da súa XLI Feira do Viño, tres días de festa nos que a chuvia non puido con ánimos dos veciños. A xornada do domingo tivo lugar a entrega dos premios da cata oficial e popular, así como a homenaxe aos viticultores. A escritora Fina Casalderrey, pregoeira desta edición, deleitou aos asistentes co seu discurso, onde rememorou a importancia da feira e a riqueza cultural de Chantada. Subida ao Faro, invitounos a descubrir as vistas que fan desta vila o «Corazón de Galicia», recordando momentos especiais, como a Feira Internacional do Libro Infantil e Xuvenil nos anos 90. Casalderrey encheu de poesía e emoción o pregón, facéndonos viaxar pola ribeira de Chantada e polo universo do viño. Tras o emotivo pregón, o alcalde Manuel Lorenzo Varela entregou un acio de uvas á pregoeira e a Lomarti, autor do cartel da feira. Varela agradeceu a asistencia e participación de todos os presentes, destacando o esforzo dos viticultores e adegueiros que fan posible este evento ano tras ano.
Os asistentes tiveron a oportunidade de degustar os mellores viños da zona, premiados tanto na cata oficial como na popular. Destacaron viños como «Cabo do Mundo Mencía 2023» e «Calexotes Godello 2023», recoñecidos co Vide Gran Ouro.
As adegas participantes recibiron unha lembranza desta edición, entregada polas autoridades locais e polos ciclistas Álvaro Pino e Ezequiel Mosquera. Manuel Lorenzo Varela animou a seguir probando o viño novo, acompañado da deliciosa gastronomía de Chantada. A Feira do Viño de Chantada culminou cun éxito rotundo, reforzando o seu papel como un dos eventos máis destacados da comarca.•
Cargando ...
