O alcalde de Chantada, Manuel Lorenzo Varela, acompañado por Iñaki Castiñeira, presidente da Asociación de Empresarios de Chantada-CCA Ribeira Sacra, visitou o Polígono de Os Acivros para supervisar as tarefas de limpeza levadas a cabo polo concello nos accesos e beirarrúas do polígono industrial chantadino.
Durante a visita, analizouse a elevada demanda de parcelas neste parque empresarial. Actualmente, seis empresas locais están a construír as súas naves en parte das parcelas anteriormente dispoñibles. Manuel Lorenzo Varela subliñou que «é un feito histórico para Chantada que se instalen seis empresas ao mesmo tempo e todas elas de sectores distintos. Actualmente, o polígono chantadino é o que experimenta un maior crecemento na provincia de Lugo en termos de número de habitantes».
O rexedor local informou que se están a realizar os trámites necesarios para ampliar o polígono no menor prazo posible e continuar dotándoo de sinais identificativas nos accesos á área industrial. «O ritmo do polígono é moi positivo, as parcelas están a esgotarse, quedan 3 ou 4 por vender. Desde o Concello estamos a traballar a todo vapor para realizar as ampliacións pertinentes. Ampliaremos cara á N-540 para darlle máis visibilidade ao Polígono e tamén por detrás, onde se realizou a segunda fase», explicou o alcalde.
O Concello de Chantada é responsable de todos os servizos do Polígono dos Acivros, incluíndo saneamento, iluminación, estradas e beirarrúas. O ano pasado, a Xunta de Galicia e o Concello destinaron 1,3 millóns de euros para mellorar o subministro eléctrico desde a subestación de Vilela, en Merlán. «Con isto, o Polígono ten capacidade eléctrica para triplicarse», asegurou o alcalde.
O Polígono Industrial dos Acivros comezou a funcionar en 1986 cunha primeira fase realizada por Sigalsa, na que queda por vender unha parcela de máis de 8.000m2. A segunda fase foi realizada por Suplusa a través da Deputación Provincial e, despois das últimas ventas, quedan tres parcelas por vender.•
Cargando ...
